Müəllimlərin imtahan nəticələri ilə bağlı - Açıqlama
Təhsil Nazirliyi “İstedadlı şagird üçün istedadlı müəllim” müsabiqəsinin nəticələri ilə bağlı yaranan müzakirələrə aydınlıq gətirib. “Qafqazinfo” xəbər verir ki, açıqlamada müsabiqənin təşkili və keçirilməsində əsas məqsədin şagirdlərimizin beynəlxalq fənn olimpiadalarında nailiyyətlərinin yüksəldilməsi istiqaməsində töhfə verəcək müəllimlərin müəyyənləşdirilməsi, onların olimpiadalara hazırlıq prosesinə cəlb edilməsinin olduğu bildirilib:
“Ancaq təəssüflər olsun ki, bəzən məsələyə geniş pəncərədən baxılmayaraq qeyri-müəyyən şərhlərlə şou effekti yaratmağa çalışan şəxslər var.
Dünyanın aparıcı ölkələrində aparılan araşdırmalara görə, xüsusi istedadlı şagirdlər bütün şagirdlərin 2 faizini təşkil edir. Bu şagirdlərlə işləyəcək müəllimlərin müəyyən edilməsi üçün keçirilən müsabiqədə təqdim edilən tapşırıqlar kifayət qədər spesifik bir sahəni əhatə edir. Ona görə də bu meyarla müəllimləri dəyərləndirmək doğru yanaşma sayılmamalıdır. Dünyanın hər bir yerində beynəlxalq olimpiadalara hazırlıq proqramı əsasında tədris prosesini həyata keçirə bilən müəllimlər barmaqla sayıla biləcək qədər azlıq təşkil edir”.
Qeyd edək ki, iqtisadçı ekspert Qubad İbadoğlu imtahan nəticələrini ayrı-ayrı fənlər üzrə açıqlayaraq müqayisə etmişdi. O, riyaziyyat müəllimlərinin 99 , kimya müəllimlərinin 95 , fizika müəllimlərin 94 , informatika müəllimlərinin 90 , biologiya müəllimlərinin 49 faizinin test suallarının yarıdan çoxunu düzgün cavablandırmadığını bildirib.
