Neftçalanın icra başçısı səyyar görüş keçirib - FOTOLAR
Neftçala Rayon İcra Hakimiyyətinin başçısı Həsənəbad qəsəbəsinin sakinləri ilə səyyar görüş keçirib.Vətəndaş qəbulunda Neftçala Rayon İcra Hakimiyyətinin başçısı Mirhəsən Seyidov, RİH-in məsul şəxsləri, hüquq- mühafizə orqanlarının, idarə, müəssisə və təşkilatların rəhbərləri, şəhid ailələri, qazilər və kənd sakinləri iştirak ediblər.
İlk öncə, Ulu Öndər Heydər Əliyevin və Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların ruhu bir dəqiqəlik sükutla yad edilib.
Həsənəbad qəsəbə ərazi dairəsi üzrə nümayəndə çıxış edərək, Həsənəbad qəsəbəsi haqqında görüş iştirakçılarına geniş məlumat verib.
Çıxışçılar "Müstəqillik və suverenlik Azərbaycan xalqının ən dəyərli sərvətidir" mövzusunda iştirakçılara məlumat veriblər və bildiriblər ki, Azərbaycan xalqı əsrlər boyu azadlıq, müstəqillik və suverenlik uğrunda mübarizə aparıb, öz torpağı və milli kimliyi uğrunda böyük sınaqlardan keçib. Bu mübarizə yolunda xalqının hər zaman yanında olan, daim xalqa arxalanan Ümummilli Lider Heydər Əliyev zəngin dövlətçilik təcrübəsinə, yüksək idarəetmə bacarığına söykənərək çox qətiyyətli, müdrik qərarlar qəbul edib, Azərbaycanın dövlət müstəqilliyini möhkəmləndirib, ölkəmizin və xalqımızın milli inkişafını təmin etməsi haqqında danışıblar.
Neftçala RİH-in başçısı Mirhəsən Seyidov çıxış edərək bildirib ki, Azərbaycan xalqının Ümummilli Lideri Heydər Əliyev deyirdi: “Azərbaycanın dövlət müstəqilliyi bizim üçün ən əziz, ən qiymətli nailiyyətdir və bu nailiyyəti – dövlət müstəqilliyimizi daim qoruyub saxlayacağıq. Müstəqilliyin əldə olunması nə qədər çətindirsə, onun saxlanılması, daimi və əbədi olması bundan da çətindir”. Azərbaycan Respublikasının müstəqilliyi Ulu Öndər Heydər Əliyevin rəhbərliyi ilə daha da möhkəmləndi, dövlətçiliyin əsasları qoyuldu və beynəlxalq aləmdə tanınan güclü bir dövlət formalaşdı. Bu gün Prezident cənab İlham Əliyevin rəhbərliyi ilə Azərbaycan öz suverenliyini daha da gücləndirir, ərazi bütövlüyünü bərpa edib və dünyada etibarlı tərəfdaş kimi tanınır. Müstəqillik bizə həm milli kimliyimizi qorumaq, öz tariximizi yazmaq və gələcək nəsillərə azad və firavan bir vətən miras qoymaq imkanı verir. Suverenlik müstəqilliyin təminatçısıdır. Bu anlayış bir-birindən ayrılmazdır və hər bir azərbaycanlının qəlbində ən ali dəyərlərdən biri kimi yaşayır. Bu gün Azərbaycan gəncliyi də anlayır ki, müstəqillik birdəfəlik əldə olunan bir nemət deyil, daim qorunmalı, müdafiə olunmalı və inkişaf etdirilməlidir. Xalqın birliyi, ordumuzun gücü, milli həmrəylik və dövlətə bağlılıq bu dəyərin qorunmasının əsas şərtləridir.
RİH-in başçısı, Zəfərlə yekunlaşan 44 günlük Vətən müharibəsindən sonra bölgədə yaranan yeni geosiyasi reallıqlar fonunda Müzəffər Ali Baş Komandan İlham Əliyevin tarixi ədalətin bərpa edilməsi konsepsiyasının davamının məcburi köçkünlərin və qaçqınların Böyük Qayıdışını təmin etmək olduğunu bildirib. O, həmçinin Azərbaycan xalqının milli-mənəvi dəyərlərini və haqqını bərpa etmək missiyasının önəmindən danışıb. Müzəffər Ali Baş Komandan cənab İlham Əliyevin Qərbi Azərbaycan İcmasının üzvləri ilə görüşdə bununla bağlı ciddi tapşırıqlar verdiyini vurğulayıb. Həmçinin, Azərbaycan xalqının haqqının bərpa olunması və Qərbi Azərbaycan İcmasının hüquqlarının beynəlxalq səviyyədə tanıdılması istiqamətində ölkə rəhbərinin sərgilədiyi mövqeyin tarixçilər və hüquqşünaslar üçün ciddi vəzifələr qoyduğunu qeyd edib.
Neftçala RİH-in başçısı, Neftçala rayonunda həyata keçirilən yenidənqurma işləri barədə görüş iştirakçılarına məlumat verib.
Səyyar qəbul zamanı vətəndaşlar, rayon ərazisində aparılan abadlıq- quruculuq işlərinə görə öz təşəkkürlərini bildiriblər, həmçinin məişət tullantıları üçün əlavə yerlərin yaradılması və digər məsələlər üzrə müraciətlərini irəli sürüblər. Vətəndaşların müraciətləri ayrı-ayrılıqda dinlənilib, məsələlər müzakirə edilib və həll olunması üçün aidiyyəti üzrə tapşırıqlar verilib.
Vətəndaşlar göstərilən yüksək diqqət və qayğıya, həmçinin rayon ərazisində aparılan abadlıq-quruculuq işlərinə görə Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyevaya minnətdarlıqlarını ifadə ediblər.
Məlumat üçün bildiririk ki, vətəndaş məmnunluğunu artırmaq və xidmət keyfiyyətinin yaxşılaşdırılmasını təmin etmək məqsədilə vətəndaşlar Neftçala Rayon İcra Hakimiyyəti ilə həm onlayn, həm də yerində görüşlər üçün yaradılan "Rəqəmsal İcra Hakimiyyəti" https://rih.gov.az portalına daxil olaraq müraciət edə bilərlər.
