Almaniya prezidentinin səfəri ölkələrimizi bir-birinə daha yaxın edəcək - ŞƏRH
Almaniya Prezidenti Frank-Valter Ştaynmayerin Azərbaycana səfəri iki ölkə arasında qarşılıqlı münasibətlərin daha da gücləndirilməsi və əməkdaşlığın genişləndirilməsi baxımından mühüm əhəmiyyət kəsb edir.
Bu gün Azərbaycan Respublikası praqmatik xarici siyasəti sayəsində beynəlxalq münasibətlər sistemində nüfuzlu mövqeyi ilə seçilən ölkəyə çevrilib. Mehriban qonşuluq, qarşılıqlı faydalı əməkdaşlıq əsasında qurulan uğurlu siyasət regional və beynəlxalq səviyyədə diqqət çəkir. Bu kontekstdə Avropa İttifaqının ən güclü və aparıcı ölkələrindən biri olan Almaniya Federativ Respublikası ilə son dövrlər inkişaf etməkdə olan qarşılıqlı münasibətlər mühüm əhəmiyyət kəsb edir. Bu baxımdan 2 aprel tarixində Almaniya Prezidenti Frank-Valter Ştaynmayerin Azərbaycana səfəri iki ölkə arasında qarşılıqlı münasibətlərin daha da gücləndirilməsi və əməkdaşlığın genişləndirilməsi baxımından mühüm əhəmiyyət kəsb edir. Səfər çərçivəsində Azərbaycan Respublikasının Prezidenti cənab İlham Əliyevin Almaniya Prezidenti Frank-Valter Ştaynmayer ilə təkbətək və geniş tərkibdə görüşləri keçirilmiş, prezidentlər mətbuata bəyanatlarla çıxış etmişlər.
Keçirilən görüş və müzakirələrdə ikitərəfli əlaqələrin inkişaf perspektivləri nəzərdən keçirilib. Möhtərəm president cənab İlham Əliyev bu səfərin münasibətlərə yeni müsbət təkan verəcəyinə inamını ifadə edib: “Əminəm ki, bu səfərin çox müsbət nəticələri olacaqdır. İkitərəfli münasibətlərimizin tarixində bu, Almaniya prezidentinin Azərbaycana birinci rəsmi səfəridir.
Əminəm ki, səfərin yekunları bizim ölkələrimizi bir-birinə daha yaxın edəcəkdir.” Çıxışı əsnasında Dövlət başçısı ötən il ölkəmizdə keçirilmiş COP29-un uğurlu nəticələrindən söhbət açaraq bu istiqamətdə Almaniyanın bizimlə çox fəal əməkdaşlıq etdiyini məmnunluqla vurğuladı. Dövlət başçısı nitqində Azərbaycanın ev sahibliyi etdiyi beynəlxalq iqlim konfransı qlobal iqlim gündəliyində mühüm yer tutmuş və dünya ictimaiyyətinin diqqət mərkəzində olduğunu ifadə edərək dünyanın 197 ölkəsini təmsil edən 77 mindən çox iştirakçının qatıldığı bu konfransın uğurlu nəticələrlə yadda qaldığını diqqətə çatdırmışdır. Prezidentin nitqində həmçinin Orta Dəhliz layihəsi və bu layihədə Azərbaycanın rolu, ölkələrimiz arasında enerji sahəsində əməkdaşlıq məsələləri, yaşıl enerji ilə bağlı əməkdaşlıq istiqamətində gələcək hədəflər açıqlanıb.
Ölkə başçısı bəyanatında Azərbaycanın 30 il ərzində erməni işğalındanəziyyət çəkməsi, beynəlxalq təşkilatların bu münaqişəyə ciddi müdaxilə etməməsi ölkəmizin öz gücü ilə ədaləti bərpa etməsi xüsusi vurğulanıb. Qeyd olunub ki, Qarabağ Zəfəri regionda sülh prosesini sürətləndirdi və bu gün Azərbaycan-Ermənistan münasibətləri daha konstruktiv müstəviyə keçməkdədir. Azərbaycan və Almaniya prezidentləri arasında keçirilən görüşdə dünya siyasətində aktual məsələlər, o cümlədən ABŞ-Avropa İttifaqı münasibətləri və Rusiya-Qərb gərginliyi kimi mövzuları da müzakirə olunmuşdur. Bu məsələlər beynəlxalq münasibətlərin inkişafına təsir göstərdiyi üçün onların hərtərəfli müzakirəsi və əməkdaşlıq perspektivləri xüsusi əhəmiyyət kəsb edir. Əminliklə söyləmək olar ki, Almaniya Prezidenti Frank-Valter Ştaynmayerin Azərbaycana məlum səfəri ölkələrimiz arasında əlaqələrin inkişafına əsaslı təkan verəcək, qarşılıqlı əməkdaşlığın yeni mərhələyə keçməsinə şərait yaradacaqdır.
Həbulla Rəhimov;
Neftçala rayonu, müəllim
