Şuşa milli birliyin, dövlətçilik ənənələrinin və gələcək nəsillərə ötürülən Zəfər ruhunun təcəssümüdür - ŞƏRH
Şuşa Azərbaycan xalqının tarixində sadəcə bir şəhər deyil, milli kimliyimizin, mənəvi bütövlüyümüzün və dövlətçilik yaddaşımızın canlı təcəssümüdür. Bu şəhərin hər qarışı xalqımızın əsrlər boyu qoruyub yaşatdığı vətən sevgisinin, azadlıq iradəsinin və milli qürurunun ifadəsidir. Şuşanın taleyi Azərbaycanın tarixi ilə o qədər sıx bağlıdır ki, onun azadlığı bütövlükdə xalqımızın mənəvi qələbəsi kimi dəyərləndirilir.
Uzun illər işğal altında qalmasına baxmayaraq, Şuşa Azərbaycan xalqının yaddaşından heç vaxt silinmədi və onun azad olunacağına olan inam nəsildən-nəslə ötürüldü. Bu inam xalqımızın milli həmrəyliyinin və tarixi ədalətə sarsılmaz bağlılığının mühüm göstəricisi idi. 2020-ci il noyabrın 8-də Azərbaycan Ordusunun Şuşanı işğaldan azad etməsi həmin tarixi inamın gerçəkləşdiyi möhtəşəm gün kimi yadda qaldı. Şuşa Zəfərinin əsas mənəvi dayaqlarından biri Azərbaycan xalqının vahid amal ətrafında birləşməsi idi. Vətən müharibəsi dövründə cəmiyyətin bütün təbəqələrinin nümayiş etdirdiyi həmrəylik dövlət və xalq birliyinin nə qədər böyük gücə malik olduğunu sübut etdi. Möhtərəm Prezident cənab İlham Əliyevin qətiyyətli rəhbərliyi, Azərbaycan Ordusunun qəhrəmanlığı və xalqın sarsılmaz dəstəyi tarixi qələbənin əldə olunmasında mühüm rol oynadı. Bu Zəfər Azərbaycan gəncliyinə vətənpərvərliyin yalnız söz deyil, əməl və məsuliyyət olduğunu nümayiş etdirdi. Şəhidlərimizin müqəddəs xatirəsi, qazilərimizin fədakarlığı və əsgərlərimizin qəhrəmanlığı milli yaddaşımızın əbədi tərkib hissəsinə çevrildi. Onların göstərdiyi igidlik gələcək nəsillər üçün vətənə sədaqət, cəsarət və milli məsuliyyət nümunəsidir.
Bu gün Şuşanın bərpası və inkişafı milli birliyin yeni məzmunla davam etdirilməsi baxımından xüsusi əhəmiyyət daşıyır. Şəhərdə həyata keçirilən quruculuq işləri xalqımızın öz tarixinə, mədəniyyətinə və gələcəyinə sahib çıxmaq iradəsini nümayiş etdirir. Tarixi abidələrin bərpası, mədəni tədbirlərin yenidən təşkili və sosial infrastrukturun yaradılması Şuşanın əvvəlki şöhrətinə qovuşmasına xidmət edir. Vaqif Poeziya Günlərinin və “Xarıbülbül” Beynəlxalq Musiqi Festivalının Şuşada keçirilməsi şəhərin mənəvi həyatının dirçəlişinin parlaq nümunələridir. Doğma yurdlarına qayıdan insanların iştirakı ilə şəhərin yenidən canlanması Böyük Qayıdış siyasətinin mühüm mənəvi nəticələrindən biridir.
Şuşanın inkişafı həm də Azərbaycan gəncliyinin milli-mədəni irsə bağlılığının möhkəmləndirilməsi üçün geniş imkanlar yaradır. Müasir dövrdə milli yaddaşın qorunması, tarixi həqiqətlərin gələcək nəsillərə çatdırılması və vətənpərvərlik dəyərlərinin gücləndirilməsi hər bir cəmiyyətin mühüm vəzifəsidir. Bu baxımdan Şuşa Zəfərinin məktəblərdə, ali təhsil müəssisələrində, elmi araşdırmalarda və ictimai-mədəni tədbirlərdə geniş təbliği xüsusi əhəmiyyət kəsb edir. Gələcək nəsillər Şuşanın tarixini öyrənməklə yalnız keçmişimizi deyil, həm də müstəqil dövlətimizin hansı çətinliklər və fədakarlıqlar hesabına möhkəmləndiyini dərk edəcəklər. Milli birliyin qorunması, dövlətçilik ənənələrinə sədaqət və vətənə məsuliyyətli münasibət Azərbaycanın gələcək uğurlarının əsas təminatıdır. Şuşa bu dəyərlərin birləşdiyi, keçmişlə gələcək arasında mənəvi körpü yaradan müqəddəs məkandır. Şuşanın azadlığı ilə Azərbaycan xalqı öz tarixi yaddaşına, milli qüruruna və gələcəyə olan inamına yeni nəfəs verdi. Bu səbəbdən Şuşa Zəfəri yalnız bir tarixi hadisə kimi deyil, Azərbaycan dövlətçiliyinin və milli ruhunun əbədi yaşarlılığını təsdiqləyən ümummilli mənəvi sərvət kimi qorunmalı və gələcək nəsillərə ötürülməlidir.
Ülviyyə Abdullayeva
Neftçala rayonu
