Dəyərdən imicə - Milli brendlərin gücü
Qloballaşan dünyada milli brendlərin tanıdılması hər bir ölkənin iqtisadi müstəqilliyi, mədəni özünəməxsusluğu və beynəlxalq nüfuzu baxımından xüsusi əhəmiyyət daşıyır. Brend sadəcə məhsul və ya xidmətin adı deyil, həm də ölkənin siması, mədəniyyətinin, dəyərlərinin və həyat tərzinin daşıyıcısıdır. Bu baxımdan, milli brendlərin tanıdılması həm iqtisadi, həm də mədəni strateji prioritet kimi dəyərləndirilməlidir.
Milli brend – bir ölkənin daxilində yaradılmış, yerli dəyərlərə əsaslanan, o ölkənin mədəni, tarixi və iqtisadi simasını təcəssüm etdirən məhsul, xidmət və ya marka deməkdir.
Onlayn brend səfirləri və təsirçilərlə əməkdaşlıq
Bu günlərdə “Biznes Mərkəzi Klubu”nun İdarə Heyətinin sədri Rüfət Nadirlinin təşkilatçılığı ilə Bakıda “Milli Brendlərin Pərakəndə Zirvəsi – 2025” adlı mötəbər forum keçirildi. Tədbirə 400-dən çox qonaq – rəsmi şəxslər, tanınmış şirkət rəhbərləri və media nümayəndələri qatılmışdı. Forumda spikerlər yeni dövrün tələblərinə uyğun strateji yanaşmaları bölüşərək, brendlərin beynəlxalq bazarlara çıxışı, rəqəmsal marketinqin rolu, müştəri təcrübəsinin fərdiləşdirilməsi, loqistika və təchizat zəncirinin optimallaşdırılması kimi mövzularda fikir mübadiləsi aparıblar.
Qeyd edim ki, forum milli brendlərin inkişafı üçün çox mühüm bir platforma idi. Qısa desək milli brendlərin tanıdılması ölkənin iqtisadi inkişafının mühüm tərkib hissəsi olmaqla yanaşı, milli kimliyin qorunması və dünyada tanıdılması baxımından da strateji əhəmiyyət kəsb edir. Bu sahədə sistemli yanaşma, innovativ həllər və dövlət-özəl tərəfdaşlığı gələcək uğurların əsasını təşkil edə bilər. Azərbaycan brendləri artıq təkcə ölkə daxilində deyil, beynəlxalq bazarda da tanınmağa başlamışdır. Bu prosesin davamlı olması üçün hər kəs – sahibkar, vətəndaş, dövlət və media öz töhfəsini verməlidir.
Aslan Abbaszadə
Faktor.az xəbər portalının Baş Redaktoru
AQAT-Silver mağazalar şəbəkəsinin rəhəbri
