Ümumxalq birliyi!

Hit: 317
Ümumxalq birliyi!
Müsəlman şərqində ilk dünyəvi demokratik respublika olan Azərbaycan Xalq Cümhuriyyəti dövlətçilik tariximizin önəmli hadisəsi kimi yaddaşlara əbədi həkk olunmuşdur. 1918-ci ilin 28 may tarixində Şərqdə demokratik bir dövlətin təməli qoyuldu. Çox təəssüf ki, həmin dövrdə yeni yaranmış bu dövlətin yaşaması, möhkəmlənməsi üçün münbit tarixi şərait olmadı. Əksinə həmin dövr çox çətin, mürəkkəb ictimai-siyasi proseslərin baş verdiyi zaman idi.

Belə bir çətin zamanda fəaliyyət göstərdi, üzləşdiyi təqiblərə, sıxışdırılmalara rəğmən dirənməyə çalışdı Azərbaycan Xalq Cümhuriyyəti. Cəmi 23 ay yaşamasına rəğmən böyük tarix yazdı, özündən sonrakı nəsillərə  yüksək dövlətçilik ənənəsi qoydu, ən başlıcası isə Azərbaycanı müstəmləkə əsarətindən xilas etdi.

Azərbaycan Xalq Cümhuriyyəti 3 rəngli, ay-ulduzlu bayrağımızı qaldırmağa, gerbimizi, dövlət himnimizi qəbul etməyə, doğma ana dilimizi dövlət dili elan etməyə, milli ordumuzu, daxili gücü-milli polisi yaratmağa, müvəffəq oldu. Tariximizin şanlı salnaməsini yazmış Cümhuriyyət fədailəri çox işlər gördü, Azərbaycanı yaşatmaq üçün çox çətinliklərlə üzləşdi, lakin ərazi bütövlüyümüzü qoruyub saxlaya bilmədi.

Acı həqiqət də olsa deməliyik ki, AXC rəhbərliyi İrəvan quberniyasını ermənilərə güzəştə getməyə məcbur qaldı, xarici və daxili basqılara tab gətirməyərək,  tarixi torpaqlarımızı təhlükə altında qoydu, digər ərazilərimizin də düşmən caynağına keçməsinə səbəbiyyət yaratdı. Danılmaz faktdır ki, İstiqlal tariximiz xalqımızı “İnsanlara hürriyyət, millətlərə istiqlal” coşqusu ilə azadlığa qovuşdurdu. Gələcəyə ümidlə  boylanan xalqımız da, məhz bu tarixin inamı ilə öz yaddaşına qayıtdı.

Məhz bu ümumxalq birliyi sayəsində Azərbaycanımız 1991-ci ildə illər uzunu həsrət qaldığı müstəqilliyini yenidən bərpa etdi. Müzəffər Ali Baş Komandan cənab İlham Əliyevin ətrafında  sıx birləşən xalqımız, igid övladları sayəsində böyük Zəfərimizi qazandı, Qalib ordumuzun gücü, qüvvəti və “Dəmir yumruq”la, muasir tariximizin şan və şərəf salnaməsini qızıl hərflərlə yazdı.

Ulu Öndərin Heydər Əliyevin uzaqgörən siyasətini, onun azərbaycançılıq ideyalarını davam və inkişaf etdirən cənab İlham Əliyev, xalqın dəstəyi və milli birliyi sayəsində müstəqil uğurlu siyasət yürüdərək, “Müstəqilliyimiz əbədidir, sarsılmazdır, dönməzdir” devizi ilə dövlətimizin adını və şanını daha da yüksəldir. Düşünülmüş, məqsədyönlü siyasət nəticəsində bu gün, həm daxili, həm də xarici siyasətdə Azərbaycanımız uğurlara imza ataraq, gündən-günə ucalır, inkişaf edir. Qürurvericidir ki, hazırda ölkəmiz dünyada həm Qalib ölkə, həm  güclü iqtisadiyyata, həm də möhkəm təməllərə sahib nüfuzlu dövlət olaraq tanınır. 
 
Filarə İsmayılova;
Neftçala rayonu, Şəhid anası
 








Redaktorun seçimi