Bir km-dən millimetrlik yazıları oxuya bilən lazer sistemi hazırlandı
Çinli tədqiqatçılar cəmi bir neçə millimetr ölçüsündəki hərfləri 1 kilometrdən artıq məsafədən oxuya bilən yüksək dəqiqlikli yeni lazer sistemi hazırlayıblar. Bu texnologiya, laboratoriya xaricində - real şəhər şəraitində sınaqdan keçirilib və gözləntiləri aşan nəticələr göstərib.
Valyuta.az xəbər verir ki, Çin Elmlər və Texnologiya Universitetindən bir tədqiqat qrupu tərəfindən hazırlanmış bu yenilikçi sistem, həm elmi dairələrdə, həm də təhlükəsizlik və müşahidə texnologiyaları ilə maraqlananlar arasında böyük marağa səbəb olub. Çünki cihaz, adi kameralardan fərqli olaraq, çox kiçik obyektləri uzaq məsafədən yüksək dəqiqliklə oxuma imkanı verir.
Sistemin əsas üstünlüyü, “aktiv sıxlıq interferometriyası” (ingiliscə: active intensity interferometry) adlanan texniki yanaşmadan istifadə olunmasıdır. Bu texnika, atmosferin yaratdığı pozuntular və işıq səpilməsi kimi məhdudiyyətləri aşmağa imkan verir. Ənənəvi kameralarda keyfiyyətli görüntü üçün yüksək səviyyəli obyektivlərə ehtiyac olduğu halda, bu lazer sistemində xüsusi “süni termal işıqlandırma” üsulundan istifadə olunur.
Bu üsulda lazer şüaları fərqli bucaqlardan hədəfə yönləndirilir və əks olunan işıq iki ayrı teleskop tərəfindən toplanaraq yüksək ayırdetməli görüntüyə çevrilir. Toplanan zəif və ya natamam siqnallar belə, xüsusi alqoritmlərlə dəqiqliklə işlənir və detallı görüntülərə çevrilir.
Tədqiqat qrupu sistemin effektivliyini nümayiş etdirmək üçün hər biri cəmi 1,5 millimetr enində olan “USTC” yazılarını 8 x 9 millimetrlik alüminium lövhələr üzərində yerləşdirib. Bu lövhə 1,36 kilometr uzaqlıqda quraşdırılıb. Lazer sistemi yalnız bu yazıları dəqiq oxumaqla kifayətlənməyib, eyni zamanda teleskopların nəzəri ayırdetmə həddini 14 dəfə keçərək təsirli görüntü keyfiyyəti təmin edib.
Bu texnologiya sadəcə görüntünü böyütməklə kifayətlənmir, eyni zamanda zəif siqnallardan və ya pozulmuş məlumatlardan belə yüksək keyfiyyətli görüntülər çıxara bilir. Üstəlik, açıq hava şəraitində — külək, işıq çirkliliyi və digər ətraf mühit faktorlarına qarşı dayanıqlı olduğu sübut olunub.
Hazırda araşdırma mərhələsində olan bu lazer sistemi, uzaqdan müşahidə, təbii fəlakətlərin izlənməsi, təhlükəli ərazilərdə nəzarət və təhlükəsizlik sahələrində geniş tətbiq potensialına malikdir. İnkişafı davam etdirilərsə, həm mülki, həm də ictimai təhlükəsizlik baxımından önəmli bir texnoloji alətə çevriləcəyi gözlənilir.
