Düşüncəni nitqə çevirən cihaz inkişaf etdirildi
ABŞ-dan olan alimlər beyindəki danışıqla bağlı düşüncələri real vaxt rejimində səsli sözlərə çevirə bilən cihaz hazırlayıblar.
Valyuta.az xəbər verir ki, aparılan tədqiqat çərçivəsində beyin siqnallarını səsə çevirən süni intellekt modeli ilə təlimləndirilmiş bu cihaz, 18 il əvvəl iflic keçirərək danışma qabiliyyətini itirmiş 47 yaşlı bir qadının beyninə yerləşdirilib.
Elm adamları cihazın birbaşa beynin danışıq mərkəzinə implantasiya edildiyini və bu bölgədən gələn sinyalların daima analiz edildiyini bildiriblər.
Tədqiqatçılar xəstənin müəyyən cümlələri zehnində canlandırdığı zaman, onun beynindən gələn siqnalları elektrodlar vasitəsilə qeydə alıb. Daha sonra xəstənin iflic keçirmədən əvvəlki səs yazılarından istifadə edərək hazırlanmış səs sintezatoru vasitəsilə düşüncələri real vaxt rejimində səsli nitqə çeviriblər.
Mütəxəssislər bu cihazın hələ sınaq mərhələsində olduğunu, lakin gələcəkdə danışma qabiliyyəti olmayan insanlara ünsiyyət qurmaqda yardımçı ola biləcəyini qeyd edirlər.
