“AZƏRMAŞ GROUP”un istiqrazları uğurla yerləşdirilib
“PAŞA Kapital İnvestisiya Şirkəti” Azərbaycanın kapital bazarları tarixində növbəti bir ilkə imza ataraq dövlətin kredit zəmanəti mexanizmi əsasında korporativ istiqrazların yerləşdirilməsini uğurla tamamlayıb.
Belə ki, “AZƏRMAŞ GROUP” MMC-nin 10 milyon manatlıq korporativ istiqrazları İpoteka və Kredit Zəmanət Fondunun (İKZF) zəmanəti əsasında “PAŞA Kapital”ın anderrayterliyi ilə 2026-cı il 15 oktyabr tarixində Bakı Fond Birjasında (BFB) keçirilən rəqabətli hərracda tam həcmdə yerləşdirilib.
İnvestorların fəal iştirakı ilə baş tutan yerləşdirməyə 66 fiziki və 5 hüquqi şəxs olmaqla, ümumilikdə 71 investor qoşulub. İstiqraz emissiyasının 100 faiz reallaşdırılması “PAŞA Kapital”ın kapital bazarında uğurlu anderraytinq fəaliyyətinin daha bir göstəricisi olub.
İnvestorların sayı və yerləşdirdikləri sifarişlər üzrə həcm bölgü aşağıdakı kimi formalaşıb:
Fiziki şəxslər: 66 investor, 4 milyon 233 min manat (42,33 faiz) sifariş həcmi;
Hüquqi şəxslər: 5 investor, 5 milyon 767 min manat (57,67 faiz) sifariş həcmi.
Hər birinin nominal dəyəri 1000 manat olan 10 min ədəd istiqraz illik 13 faiz kupon gəliri və 3 illik tədavül müddəti ilə investorlara təqdim edilib. İstiqrazlar üzrə faiz ödənişləri ilk yerləşdirmə tarixindən etibarən hər 3 aydan bir həyata keçiriləcək.
“PAŞA Kapital”ın məhsul və xidmətləri haqqında ətraflı məlumat üçün 1548 nömrəsi ilə əlaqə saxlaya və ya www.pashacapital.az saytına daxil ola bilərsiniz.
