ASR Group Özbəkistanın qida sənayesində strateji tərəfdaşlığa imza atır - FOTOLAR
Özbəkistanın aparıcı konsaltinq şirkətlərindən biri olan "ASR Distribution and Development Group" ilə Özbəkistan Qida Sənayesi Assosiasiyasının rəhbərliyi və üzv şirkətləri arasında rəsmi işgüzar görüş keçirilmişdir.
Görüşdə "ASR Distribution and Development Group" şirkətinin təsisçisi Elxan Mikayılov və şirkətin baş direktoru Əli Vəliyev şəxsən iştirak edərək rəsmi heyətlə müzakirələr aparmışlar. Görüşün əsas mövzusu ölkədə qida təhlükəsizliyi sahəsində həyata keçirilən genişmiqyaslı islahatlar, bu yeniliklərin yerli qida biznesinə təsirləri və sahibkarların yeni requlyativ tələblərə adaptasiya prosesləri olmuşdur.
Müzakirələr zamanı dövlət nəzarətində risk-əsaslı təftiş (risk-based inspection) sisteminə keçid, beynəlxalq standartların (ISO 22000, HACCP və s.) tətbiqi və yeni qaydaların qida sahəsində fəaliyyət göstərən biznes subyektləri üçün yaratdığı həm inzibati-texniki çətinliklər, həm də ixrac potensialının artırılması baxımından yeni imkanlar geniş təhlil edilmişdir.
Görüş çərçivəsində təsisçi Elxan Mikayılov və baş direktor Əli Vəliyev tərəfindən assosiasiya üzvlərinə islahatların gətirdiyi dəyişikliklərə çevik uyğunlaşma, "biznes diaqnostikası", modern idarəetmə sistemlərinin qurulması və institusional potensialın gücləndirilməsi istiqamətində şirkətin təklif etdiyi xüsusi dəstək mexanizmləri və professional konsaltinq xidmətləri təqdim edilmişdir.
Görüşün yekunu olaraq, tərəflər arasında qarşılıqlı əməkdaşlığın rəsmiləşdirilməsi, yerli istehsalçıların və ixracatçıların yeni islahatlara hazırlanması məqsədilə yaxın günlərdə Anlaşma Memorandumunun (MoU) imzalanması barədə razılıq əldə olunmuşdur.
Bu strateji tərəfdaşlıq çərçivəsində Özbəkistanın qida sənayesi subyektləri üçün birgə diaqnostika proqramlarının icrası, praktiki adaptasiya layihələrinin idarə edilməsi və sahəvi təlimlərin təşkili nəzərdə tutulur. "ASR Distribution and Development Group" rəhbərliyinin birbaşa nəzarəti altında göstəriləcək professional konsaltinq dəstəyi yerli qida bizneslərinin risklərini minimuma endirməklə yanaşı, onların beynəlxalq bazarlara inteqrasiyasını sürətləndirəcəkdir.
