Bakıda kirayə mənzil tapmaq çətinləşəcək - SƏBƏB
Son illərdə Bakıda istismar müddətini başa vurmuş çoxmənzilli binaların və mərkəzi ərazilərdə yerləşən fərdi yaşayış evlərinin söküntüsü geniş miqyas alıb. Bu çərçivədə bir çox köhnə bina və evlər sökülərək onların yerində ya parklar salınıb, ya da yeni, müasir çoxmənzilli yaşayış binaları inşa olunub.
Mövzu ilə bağlı əmlak məsələləri üzrə ekspert Elnur Fərzəliyev Modern.az-a açıqlamasında bildirib ki, paytaxtın 2040-cı ilə qədərki inkişafını nəzərdə tutan Baş Plan artıq təsdiqlənib. Plana əsasən, qarşıdakı illərdə də köhnə tikililərin mərhələli şəkildə sökülməsi davam etdiriləcək:
“Hazırda Bakıda ən ucuz kirayə mənzillər fərdi evlərin üstünlük təşkil etdiyi yaşayış massivlərində yerləşir. Belə ərazilərdə birotaqlı mənzillərin aylıq kirayə haqqı təxminən 150–200 manat civarındadır. Metroya yaxın köhnə binalarda – xüsusilə Yasamal, Nəsimi və Nərimanov rayonlarında isə birotaqlı mənzillərin kirayə qiyməti orta hesabla 400 manat təşkil edir. Otaq sayı artdıqca, qiymətə hər otaq üçün əlavə olaraq, təxminən 100–150 manat əlavə olunur”.
E.Fərzəliyev əlavə edib ki, yeni tikililərdə kirayə qiymətləri köhnə binalarla müqayisədə təxminən iki dəfə yüksəkdir:
“Son illərdə aparılan söküntü işləri nəticəsində ucuz kirayə mənzillərin əhəmiyyətli hissəsi bazardan çıxarılıb. Bundan əlavə, sökülən binalarda yaşayan sakinlərə yeni mənzillər təqdim edilənə qədər – orta hesabla 2–3 il müddətində – kirayədə yaşamaq zərurəti yaranır. Bu da ümumi kirayə bazarında tələbin artmasına və qiymətlərin yüksəlməsinə səbəb olur”.
Ekspertin fikrincə, qarşıdakı 15 il ərzində - yəni 2040-cı ilə qədər yüzlərlə köhnə bina və fərdi evin sökülməsi gözlənilir. Bu proses, xüsusilə şəhər mərkəzi və ətraf ərazilərdə münasib qiymətə kirayə mənzil tapmağı daha da çətinləşdirəcək:
“Artıq bu tendensiya özünü göstərməkdədir. Bir çox tələbə kirayə qiymətlərinə görə Bakının ətraf qəsəbələrinə, o cümlədən Abşeron, Xırdalan, Masazır və digər ərazilərə üz tutur. Bu isə onların gündəlik olaraq əlavə yol xərcləri çəkməsinə və vaxt itkisinə səbəb olur”.
E.Fərzəliyev eyni zamanda tələbələrin mənzil problemi məsələsinə də toxunub. Onun sözlərinə görə, bugünkü tələbələr gələcəyin ixtisaslı kadrlarıdır və onların yaşayış şəraiti təhsil keyfiyyətinə birbaşa təsir göstərir:
“1990-cı illərin əvvəllərində Birinci Qarabağ müharibəsi zamanı bölgələrdən məcburi köçkünlərin yerləşdirildiyi tələbə yataqxanalarının əksəriyyəti bu gün yaşayış üçün tam yararsız vəziyyətdədir”.
Ekspert onu da qeyd edib ki, dövlət tərəfindən məcburi köçkünlər üçün yeni mənzillər tikilib və onlar mərhələli şəkildə işğaldan azad edilmiş ərazilərə köçürülür:
“Buna baxmayaraq, köhnə yataqxanaların yerləşdiyi torpaq sahələri hələ də mövcuddur. Bu ərazilərdə müasir və çoxmərtəbəli tələbə şəhərciklərinin inşası həm tələbələrin kirayə yükünü azalda, həm də paytaxtdakı kirayə bazarındakı gərginliyin qarşısını ala bilər. Belə yataqxanalar minimal qiymətlərlə təmin edilə və universitetlərə yaxın məsafədə yerləşdirilə bilər. Bu isə tələbələr üçün həm maddi, həm də logistik baxımdan əlverişli olar”.
Elnur Fərzəliyev son olaraq bildirib ki, tələbə yataqxanalarının yenidən tikilməsi həm sosial, həm də iqtisadi baxımdan vacib addım olar və ümumilikdə isə Bakıda kirayə mənzil bazarının stabilləşməsinə töhfə verər.
