"OpenAl" Pentaqonla 200 milyon dollarlıq müqavilə imzaladı
Amerikanın "OpenAI" şirkəti milli təhlükəsizlik sahəsində problemlərin həllini nəzərdə tutan süni intellekt sisteminin prototipinin yaradılması üçün ABŞ Müdafiə Nazirliyi (Pentaqon) ilə 200 milyon dollarlıq müqavilə imzalayıb.
Valyuta.az xəbər verir ki, bu barədə şirkətin rəsmi bloqunda deyilir.
Müqavilənin şərtlərinə əsasən, "OpenAI" həm döyüş şəraitində, həm də müdafiə idarəsinin inzibati və analitik strukturlarında tətbiq olunan qabaqcıl süni intellekt alətləri hazırlayacaq. İşlərin 2026-cı ilin iyul ayına kimi başa çatdırılması nəzərdə tutulur.
Keçən ilin sonunda "OpenAI" həmçinin silah istehsalçısı "Anduril Industries Inc." ilə əməkdaşlıq edəcəyini açıqlayıb. Əməkdaşlıq çərçivəsində pilotsuz təyyarələrlə mübarizə üçün AI sistemi hazırlanacaq. Şirkətin portfelinə həmçinin "ChatGPT Gov" - dövlət işçiləri üçün AI, NASA, Milli Səhiyyə İnstitutu, Hərbi Hava Qüvvələri Tədqiqat Laboratoriyası və Xəzinədarlıq Departamenti ilə birgə layihələr daxildir.
"OpenAI" süni intellekt sahəsində aparıcı tərtibatçılardan biridir. Şirkət GPT-4 və ChatGPT dil modelləri ilə tanınır.
