30-cu Yubiley “Baku Energy Week” və 22-ci “TransLogistica Caspian” sərgiləri öncəsi iştirakçılarla görüş - FOTOLAR
Bu gün, 22 aprel tarixində regionun aparıcı enerji tədbiri olan 30-cu Yubiley “Baku Energy Week” və 22-ci Xəzər Beynəlxalq Nəqliyyat, Tranzit və Logistika “TransLogistica Caspian” sərgisinin iştirakçıları üçün işgüzar səhər yeməyi təşkil olunmuşdur.
İşgüzar səhər yeməyində 48 şirkətdən 70-ə yaxın nümayəndə iştirak etmişdir. Tədbirdə Bakı Enerji Həftəsinə dəstək göstərən Azərbaycan Respublikasının Energetika Nazirliyi, baş tərəfdaş qismində çıxış edən Azərbaycan Respublikası Dövlət Neft Şirkəti (SOCAR) və iştirakçı şirkətlərin nümayəndələri iştirak etmişdir.
Tədbir zamanı sərgiyə hazırlıq prosesində diqqət olunmalı məsələlər, eləcə də iştirakçılara işgüzar əlaqələr qurmaq üçün sərginin təmin etdiyi imkanlardan maksimum dərəcədə faydalanmaq yolları haqqında məlumat təqdim olunmuşdur. İşgüzar səhər yeməyi interaktiv formada sual-cavab sessiyası ilə keçirilmişdir.
Tədbirdə 30-cu Yubiley "Baku Energy Week" və "TransLogistica Caspian" sərgisinin işgüzar proqramı, eləcə də 30-cu Yubiley Bakı Enerji Həftəsi çərçivəsində keçiriləcək yubiley tədbirləri barədə iştirakçılara ətraflı məlumat verilib.
Xəzər regionunun nəhəng enerji tədbiri olan “Baku Energy Week” və “TransLogistica Caspian” sərgisi 2–4 iyun tarixlərində Bakı Ekspo Mərkəzində keçiriləcəkdir. “Baku Energy Week”in tərkibi sayılan “Baku Energy Forum” 3–4 iyun tarixlərində Bakı Konqres Mərkəzində keçiriləcəkdir.
İşgüzar səhər yeməkləri iştirakçılara sərgidə satışlarını artırmaq və iştiraklarının effektivliyini yüksəltmək, netvörkinq, reklam imkanlarından maksimum istifadə etmək üçün faydalı məlumatlar və praktiki tövsiyələr təqdim edir. Bu tədbirlər sayəsində iştirakçılar müzakirə olunan üsul və strategiyaları tətbiq edərək məqsədlərinə daha sürətli və effektiv şəkildə çata, həmçinin sərgilərin təqdim etdiyi imkanlardan tam faydalana bilərlər.
