Çernobıl xilasedicisi faciə haqda seriala baxıb intihar etdi

38 dəfə oxunub
Çernobıl xilasedicisi faciə haqda seriala baxıb intihar etdi
1986-cı ildə “Çernobıl” Atom Elektrik Stansiyasındakı partlayışdan sonra ora ilk yollanan xilasedici qruplardan birinin üzvü Naqaşibay Jusupov intihar edib.
 
Faktor.az “Daily Mail” nəşrinə istinadən verdiyi xəbərə görə, Qazaxıstanda yaşayan 61 yaşlı Jusupov Aktoba şəhərində evində canına qəsd edib.
 
Mərhumun qızı Qauhar bildirib ki, atası “Çernobıl” serialına baxdıqdan sonra iyunun sonlarında özünü öldürüb. 
 
Çernobıl əlilləri ictimai birliyinin rəhbəri Bakitjan Satov bildirib ki, Jusupov elektrik stansiyasının dördüncü blokunda işləyib. Beş uşaq atası olan xilasedici uzun illər mənzil növbəsində olub, lakin daha sonra adının siyahıdan çıxarıldığını öyrənib. 
 
Onun Çernobıldan qayıdandan sonra güclü başağrıları olurmuş. Bəzən küçədə getdiyi yerdə huşunu itirirmiş.
 
Xatırladaq ki, 1986-cı il aprelin 26-da Çernobıl atom elektrik stansiyasında baş vermiş hadisədən sonra həyat üçün təhlükə kəsb edən radioaktiv duman yaranıb. Nəticədə 17 milyon insanın yaşadığı 11 rayonun atmosferi zəhərlənib.
 
Qəza nəticəsində Ukraynada 4400 nəfər həyatını itirib. Onlardan çoxu partlayışın nəticələrinin aradan qaldırılması üçün əraziyə gəlmiş fəhlələr olub. Ümumilikdə faciə zamanı 7000-ə yaxın insan həlak olub, 25 min nəfər güclü radiasiya nəticəsində ömürlük şikəstliklə üzləşib, on minlərlə insan isə sonsuz qalıb. Bu faciədən sonra Çernobılda doğulan uşaqların 90%-də əlillik yaranır.
 
Bu məqamda bildirək ki, qəzanın nəticələrinin aradan qaldırılması üçün 1986-ci ildə Çernobıla 7 min azərbaycanlı da göndərilib. Onların 2000 nəfəri şüalanmadan vəfat edib.



Redaktorun seçimi