Azad Rəhimov beynəlxalq təşkilatlara məktub ünvanlayıb

Hit: 937
Azad Rəhimov beynəlxalq təşkilatlara məktub ünvanlayıb
Gənclər və İdman naziri Azad Rəhimov xarici ölkələrin gənclər və idman sahələrinə məsul nazirliklərinə, beynəlxalq təşkilatlara və digər aidiyyəti qurumlara Ermənistanın Azərbaycana qarşı apardığı hərbi təcavüzü özündə əks etdirən məktub göndərib.
 
Nazirliyin mətbuat katibi Səmayə Məmmədovanın Faktor.az-a verdiyi məlumata görə, məktubda 30 ildir Ermənistanın Azərbaycana qarşı silahlı təcavüzünün davam etdiyi vurğulanıb. Onun sözlərinə görə, təcavüz nəticəsində ölkəmizin ərazilərinin 20 faizi, o cümlədən keçmiş Dağlıq Qarabağ Muxtar Vilayəti (DQMV) və digər 7 rayon işğal edilib, 20 min azərbaycanlı həlak olub, 50 min insan yaralanıb və müxtəlif dərəcəli xəsarət alıb, 5 mindən artıq azərbaycanlı əsir və itkin düşüb.
 
Bununla yanaşı, məktubda Ermənistanın öz ərazisində və işğal etdiyi Azərbaycan ərazilərində həyata keçirdiyi etnik təmizləmə siyasəti nəticəsində 1 milyondan artıq azərbaycanlının qaçqın və məcburi köçkünə çevrilməsi, 1994-cü ildə əldə edilmiş atəşkəs rejiminə baxmayaraq, Ermənistan silahlı qüvvələrinin davamlı olaraq Azərbaycan ərazisindəki mülki əhalini və hərbi mövqelərini hədəfə alması, nəticədə yüzlərlə vətəndaşımızın öldürülməsi və ya müxtəlif dərəcəli bədən xəsarətləri alması əksini tapıb.
 
1992-ci ilin fevralında Ermənistan ordusunun törətdiyi Xocalı soyqırımından da bəhs edən nazir Ermənistanın Cenevrə Konvensiyasını, o cümlədən, BMT-nin Uşaq Hüquqları Konvensiyasını və insan hüquqları sahəsində digər sənədlərin müvafiq müddəalarını kobud şəkildə pozduğunu xüsusi diqqətə çatdırıb.
 
Ermənistanın Azərbaycana qarşı apardığı işğalçılıq siyasətinin mühüm məqamlarını özündə əks etdirəm məktubun sonunda sentyabrın 27-də səhər saat 06:00-da Ermənistan silahlı qüvvələrinin atəşkəs rejimini növbəti dəfə kobud şəkildə pozaraq bir neçə istiqamətdə müxtəlif növ silahlardan, o cümlədən, ağır artileriyadan istifadə edərək Azərbaycanın yaşayış məntəqələrini, eyni zamanda, hərbi mövqelərini atəşə tutması bildirilir. Nəticədə Naftalan rayonu, Qaşaltı kənd sakini Qurbanov Elbrus İsa oğlu və onun 5 ailə üzvü olmaqla bütövlüklə bir ailə, o cümlədən uşaqlar həlak olub, 19 nəfər mülki şəxs müxtəlif növ bədən xəsarətləri alaraq xəstəxanalara yerləşdirilib. Mülki vətəndaşlar arasında itki sayının artdığı da bildirilib.








Redaktorun seçimi