Olimpiya çempionumuzdan qəribə qərar
2016-cı il Rio-de-Janeyro Yay Olimpiya Oyunlarında gümüş, Londonda isə qızıl medal qazanmış Azərbaycan sərbəst güləşçisi Toğrul Əsgərov gələcək yarışlarda 65 kq çəki dərəcəsində çıxış etməyəcək.
Faktor.az xəbər verir ki, bu barədə "Report"a sərbəst güləş üzrə Azərbaycan yığma komandasının baş məşqçisi Firdovsi Umudov bildirib.
Umudovun sözlərinə görə, 25 yaşlı hazırda zədəlidir və əməliyyat olunacaq: "Toğurulun boyun nayihəsindən ağır zədəsi var. O, əməliyyat olunacaq. Sonra bərpa prosesi gəlir. Belə olan halda onun əvvəlki kimi 65 kq çəki dərəcəsində çıxış etməsi çətin məsələdir. Toğrul çəki dərəcəsin dəyişəcək”.
Qeyd edək ki, Toğrul Əsgərov karyerası ərzində üçüncü dəfə çəki dərəcəsini dəyişməli olacaq. O, 2010-cu ildə dünya çempionu adını 55 kq çəki dərəcəsində əldə edib. 2012-ci il Avropa çempionatı və London Yay Olimpiya Oyunlarında Əsgərov 60 kq çəki dərəcəsində olimpiya çempionu olub. O, "Bakı 2015" I Avropa Oyunlarında qızıl və 2016-cı il Rio-de-Janeyro Yay Olimpiya Oyunlarında gümüş medalı isə 65 kq çəki dərəcəsində qazanıb.
