“Gənclər arasında narkomanlığa qarşı mübarizənin gücləndirilməsi” - FOTOLAR

Hit: 1920
“Gənclər arasında narkomanlığa qarşı mübarizənin gücləndirilməsi” - FOTOLAR
26 iyun - Narkotik vasitələrin sui-istifadəsi və qanunsuz dövriyyəsi ilə Beynəlxalq Mübarizə Günü ilə əlaqədar Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası və Gənclər və  Idman Nazirliyinin birgə təşkilatçılığı ilə   “Gənclər arasında narkomanlığa qarşı mübarizənin gücləndirilməsi” mövzusunda  onlayn konfrans keçirildi. 
Faktor.az xəbər verir ki, tədbirdə Azərbaycan Respublikası Baş nazirinin müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının sədri Əli Əhmədov, Azərbayсan Respublikasının Gənclər və İdman naziri Azad Rəhimov, Azərbaycan Respublikası Milli Məclisi sədrinin müavini, Gənclər və İdman Komitəsinin sədri Adil Əliyev, Azərbaycan Respublikası Daxili İşlər Nazirliyinin Baş Narkotiklərlə Mübarizə İdarəsinin rəisi, polis polkovniki İslam Hümbətov, “Narkotiklərə qarşı təbliğat” İctimai Birliyinin sədri, Milli Məclisin deputatı Məzahir Əfəndiyev, Azərbaycan Gənclər Fondunun icraçı direktoru Fərid Cəfərov, Azərbaycan Milli Qeyri-Hökumət Təşkilatları Forumunun Prezidenti, Dövlət Komissiyasının üzvü Rauf Zeyni, İctimai Səhiyyə və İslahatlar Mərkəzinin Layihələrin əlaqələndirilməsi şöbəsinin müdiri Səbinə Babazadə, Azərbaycan Respublikası Gənclər Təşkilatları Milli Şurasının sədri Məryəm Məcidova və digər şəxslər iştirak ediblər. 
Konfrans zamanı bildirildi ki, BMT-nin Narkotiklər və Cinayətkarlıq üzrə İdarəsinin hesablamalarına əsasən, dünyada narkotik alveri üçüncü ən çox gəlir gətirən sahə hesab olunur. Dünyada milyonlarla, ölkəmizdə minlərlə insan bu bəladan əziyyət çəkir. Beynəlxalq statistikaya əsasən gənclər və yeniyetmələr arasında narkotiklərə aludəçilik hallarının yüksələn xətlə artması xüsusi narahatlıq yaradır. Azərbaycan Respublikasında narkomanlıq ilə mübarizə Ümummilli Lider Heydər Əliyevin daimi diqqət və nəzarətində olub. 1996-cı ildə müvafiq Dövlət Komissiyası yaradılıb və daha sonra “Narkotik vasitələrin, psixotrop maddələrin və prekursorların qanunsuz dövriyyəsi ilə mübarizə haqqında” Qanun qəbul edilib.
Narkomaniyaya və narkotik vasitələrin qeyri-qanuni dövriyyəsinə qarşı mübarizə Azərbaycan dövlətinin prioritet vəzifələrindən hesab olunur. Bu günə qədər sözügedən sosial bəlanın aradan qaldırılması məqsədilə üç Dövlət Proqramı icra olunub, 2019-cu ildən etibarən isə dördüncü Dövlət Proqramı həyata keçirilməkdədir.
Nazir Azad Rəhimov çıxışında qeyd etdi ki, gənclərin layiqli vətəndaş kimi tərbiyə olunması, onlar arasında sağlam həyat tərzinin təbliği Azərbaycan Respublikasında həyata keçirilən dövlət gənclər siyasətinin əsas vəzifələrindən biridir. Vurğulandı ki, Azərbaycan Respublikasının Prezidenti cənab İlham Əliyev tərəfindən imzalanan “Azərbaycan gəncliyi 2011-2015-ci illərdə Dövlət Proqramı”nda gənclərin sağlamlığının qorunması və həssas qruplardan olan gənclərə dövlət dəstəyi sahəsində tədbirlərin reallaşdırılması nəzərdə tutulub. Bildirildi ki, “Azərbaycan gəncliyi 2017-2021-ci illərdə Dövlət Proqramı”nda bu istiqamətdə fəaliyyətin daha da genişləndirilməsi  vəzifə kimi aidiyyəti orqanlara tapşırılıb. “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı” bu istiqamətdə həyata keçirilməli olan kompleks tədbirləri müəyyən edib. 
Gənclər və İdman Naziri Azad Rəhimov çıxışı zamanı nazirliyin narkomaniya ilə mübarizə  çərçivəsində həyata keçirdiyi layihələr haqqında məlumat verərək bildirdi ki, narkomaniyaya qarşı mübarizə məqsədilə təşviqat aksiyaları, mədəni-kütləvi tədbirlər,  müsabiqələr, festivallar təşkil olunur. Gənclərin maarifləndirmə və məlumatlandırma fəaliyyətində Dayanıqlı İnkişaf Məqsədləri üzrə Gənc Səfirlər yaxından iştirak edir, gənclərlə öz bilik və təcrübələrini bölüşürlər.
Çıxışının davamında Azad Rəhimov əlavə etdi: “ Nazirlik tərəfindən ilk dəfə “Həyatla oyun” adlı tamaşa 2012-ci ildə səhnələşdirilib. Tamaşa ictimaiyyət tərəfindən hədsiz maraqla qarşılanıb.  2012-2019-cu illər ərzində Bakı şəhəri və respublikanın digər rayon və şəhərlərində 19-dan çox  Gənclərin Fiziki Aktivlik və Sağlamlıq Festivalları keçirilib. Festivallar çərçivəsində məktəblilər arasında yarışlar baş tutub, bir sıra idman növləri üzrə fəaliyyətlər nümayiş etdirilib. 2017-2019-cu il ərzində respublikanın 16 rayonunda “Sağlam gələcək üçün zərərli vərdişlərə qarşı birləşək!” devizi altında maarifləndirici tədbirlər keçirilib. Bu tədbirlərdə 3 minə yaxın yeniyetmə və gənc iştirak edib.Bununla yanaşı nazirliyin Bakı şəhəri və ölkəmizin digər rayon və şəhərlərdəki yerli idarələri, eyni zamanda gənclərin qeyri-hökumət təşkilatları tərəfindən də gənclər arasında sağlam həyat tərzinin təbliği ilə bağlı tədbirlər mütəmadi olaraq həyata keçirilir. 2016-cı ildə “Narkomaniya ilə mübarizədə gənclər təşkilatlarının rolu” mövzusunda konfrans və sərgi, 2018-ci il də isə “Narkomanlığa qarşı mübarizə mövzusunda gənc jurnalistlər arasında ən yaxşı müəllif yazıları müsabiqəsi”si Komissiya ilə birgə təşkil olunub.”
Vurğulandı ki, nazirlik Dövlət Komissiyasının İşçi qrupu ilə daim əməkdaşlıq edir, bu sahədə birgə layihələr həyata keçirir ki, bu da tədbirlərin effektivliyinə öz müsbət təsirini göstərir.
Hal-hazırda respublikamızda fəaliyyət göstərən “Gənclər evi” sosial xidmət müəssisələrində gənclərin qeyri-formal təhsili, sağlam həyat tərzi, gənclərin iştirakı, inkişafı, psixososial dəstək, peşə seçimi, informasiya-məsləhət xidmətinin göstərilməsi, karyera planlaşdırılması kimi xidmətlərə cəlb edilməsi onların asudə vaxtlarının səmərəli təşkilində, zərərli vərdişlərdən uzaqlaşdırılmasında, bir sözlə layiqli vətəndaş kimi formalaşmağında müstəsna əhəmiyyət kəsb edir.
Narkomaniyaya qarşı mübarizə sahəsində atılan addımlar öz müsbət nəticələrini verməkdədir. Lakin bu sahədə fəaliyyətin daha da genişləndirilməsinə, yeni və kreativ aksiyaların həyata keçirilməsinə ehtiyac var. Pandemiya və post-pandemiya dövründə bu sahədə həyata keçirilməli olan tədbirlərin formaları üzərində yenidən müzakirələr aparılmalı, müasir, təsiredici layihələrin keçirilməsi gündəmə gəlməlidir. Videokonfransda qeyd edildi ki, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının, Gənclər və İdman Nazirliyinin və digər dövlət qurumlarının narkomaniyaya qarşı mübarizə işinə öz töhfəsini vermək üçün bütün imkanlarını bundan sonra da səfərbər edəcək, bu istiqamətdə fəaliyyətini məqsədyönlü şəkildə davam etdirəcək. 
1
1
1








Redaktorun seçimi