İmam Hüseyn (ə) ziyarətgahı kompleksi koronovirusla mübarizədə insanların yanında - FOTOLAR
İraqın Kərbəla şəhərindəki İmam Hüseyn (ə) ziyarətgah kompleksi də epidemiya ilə əlaqədar çətinliklər çəkən sakinlərə təmənnasız köməyə başlayıb.
Belə ki, koronovirus pandemiyası ilə əlaqədar Kərbəla şəhərində komendant saatı elan edilməsi və ali mərcəiyyət ruhanilərinin hamını pandemiya ilə mübarizəyə qoşulmaq çağırışından sonra imam Hüseyn (ə) ziyarətgahının rəhbərliyi əhaliyə dəstək məqsədi ilə insanlara təmənnasız olaraq gündə 50 min baton çörək və digər zəruri ərzaq məhsullarından ibarət paketlərinin paylanılması haqqında sərəncam verib.
İslam.az-ın “Noun” informasiya agentliyinə istinadla xəbərinə görə, bunun üçün 10 çörəkxana ayrılıb. Qeyd edək ki, sözügedən çörəkxanalar 2014-cü ildə ayətullah Seyyid Sistaninin İŞİD işğalına qarşı verdiyi məlum fətvadan sonra inşa olunub. Çörəklər və ərzaq paketləri imam Hüseynin (ə) məqbərəsinin qarşısında səhər saat 8-dən 13-ə qədər paylanılır. Bir saatlıq fasilədən sonra proses yenidən bərpa edilir və axşam saat 21-ə qədər davam edir.
Eyni zamanda bildirilib ki, imam Hüseyn (ə) hərəminə aid tibbi briqadalar koronovirus epidemiyasının yayılmasının qarşısını almaq üçün Kərbəla şəhəri ərazisində genişmiqyaslı dezinfeksiya və sterilləşmə kampaniyası həyata keçiriblər.
Bundan əlavə hərəmin nəzdində olan və bütün zəruri avadanlıqlarla təchiz edilmiş 5 böyük bina zəyarətgah rəhbərliyi tərəfindən karantinə alınanların yerləşdirilməsi üçün təmənnasız olaraq müddətsiz Kərbəla şəhər administrasiyasının və Səhiyyə nazirliyinin sərəncamına verilib.
Qeyd edək ki, hazırda Kərbəla şəhərində koronavirusa 13 yoluxma faktı qeydə alınıb. Kərbəlada martın 16-dan komendant saatı tətbiq edilib.
