Qovlar sakinləri Qənirə Paşayevaya böyük ümidlər bəsləyir
Qovlar şəhərində seçicilərlə görüşən Qənirə Paşayeva ona yenidən dəstək və etimad göstərəcəklərini deyən Qovlar sakinlərinə təşəkkürünü bildirib və bundan sonra da etimadınızı doğrultmaq üçün var gücümlə çalışacağam deyib. “Bu 14 il ərzində ailənizin bir üzvü oldum, sevincinizə sevindim, kədərinizi paylaşdım, problemlərinizin həlli üçün əlimdən gələni etməyə çalışdım”, - deyən Q. Paşayeva bu illər ərzində Qovlar şəhər sakinlərini narahat edən bir çox problemlərin öz həllini tapdığını deyib və həllini gözləyən problemlərin də yaxın illərdə həllini tapacağını bildirib.
Q. Paşayeva Azərbaycanın bölgədə və dünyada artan nüfuzu, beynəlxalq siyasətdə Azərbaycanın rolu və yeri haqqında, bütün ölkədə, eləcə də Qovlar şəhərində cənab Prezidentimiz İlham Əliyevin rəhbərliyi ilə dövlət tərəfindən həyata keçirilmiş böyük işlər və həyata keçirilməsi nəzərdə tutulan layihələr barədə məlumat verib. Sakinləri parlament seçkilərində yaxından iştirak etməyə çağıran deputatlığa namizəd Q. Paşayeva bütün seçkilərdə vətəndaşların fəal iştirakını onların Azərbaycan dövlətçiliyinin möhkəmləndirilməsinə verdikləri dəyərli töhfə kimi qiymətləndirib.
Qovlar şəhər sakinləri Qənirə Paşayevanın təkcə rayon səviyyəsində deyil, respublika səviyyəsində 14 illik fəaliyyətini, onlarla mütəmadi olaraq görüşməsini, problemlərinin həlli istiqamətində daim əlindən gələni etməyə çalışmasını yüksək qiymətləndirdiklərini vurğulayaraq yenidən ona etimad göstərəcəklərini, səs verəcəklərini deyiblər. Millət vəkili Q. Paşayeva görüş zamanı ona müraciət edən şəhər sakinlərini narahat edən bəzi problemləri də dinləyib və qaldırılan təkliflərlə bağlı hökumət qurumlarına müraciət edəcəyini deyib. Q.Paşayeva həmçinin bir sıra şəhid ailələri, müharibə veteranları və fiziki imkanları məhdud insanlarla da görüşüb, onların qayğıları ilə maraqlanıb və hər zaman yanınızdayıq deyib.
