İnternet uşaqlara necə təsir edir? - Xeyrimi çoxdur, ziyanımı? - Analar danışır
Beynəlxalq NHS Digital hesabatında açıqlanıb ki, şagirdlər sosial mediadan istifadə etdiyi üçün vaxtında oyana bilmir, dərsləri zəifləyir, sağlamlıq problemi yaranır.
Faktor.az bu məsələ ilə bağlı analara "Siz bu prosesin uşaqlarınıza təsirini görürsünüzmü, görürsünüzsə, necə zərərsizləşdirirsiniz" sualı ilə müraciət edib.
"Mətbuat.az" saytının əməkdaşı Günay Elşadqızı:
"XXI əsr uşaqlarının ən böyük sevgisi telefonlaradır. Təəssüf ki, mənim qızım da telefonu çox sevir. Qızımı loqopedə aparıram, həkimlərlə məsləhətləşirəm ki, niyə indi gec dil açan uşaqlar bu qədər çoxalıb? Əslində bir çox amillər var, amma hamısının dediyi bir söz var ki, əsas amillərdən biri telefondur. Məncə, indi bütün valideynlər uşaqlarının telefona bağlılığından əziyyət çəkir. Düzdür, qızım gününün böyük hissəsini bağçada keçirir, axşam maksimum dərəcədə zaman ayırmağa çalışırıq uşağa. Amma yenə də telefon gördüsə, almayana qədər sakitləşmir və bunu bütün uşaqlarda görürəm. Hətta sosial şəbəkələrdə də tez-tez bununla bağlı videolar çıxır qarşıma. Ancaq birmənalı şəkildə də pisləyə bilmərəm internetdən istifadəni, çünki həqiqətən də uşaqların dünyagörüşündə, həyatı, ətraf aləmi tanımasında böyük təsiri olur".
Mövqe.az saytının əməkdaşı Zülfiyyə Quliyeva:
"Bizim uşaqlar balaca olduğundan sosial şəbəkə istifadə etmirlər. Amma telefonda oyunlar oynayırlar. Əlbəttə ki, bu onların sağlamlığına təsir edir. Gecə əllərindən alıb, yatırda bilmirəm. Dərslərini tələsik hazırlayırlar, fikirləri telefonun yanında qalır. Gözləri qızarır".
Jurnalist Fəxriyyə Eyyubzadə:
"Bu gün elə bir zamanda yaşayırıq ki, sosial media nəinki uşaqlarımıza, bizim özümüzə də mənfi təsir göstərir. Belə ki, sosial media bizi dost, tanış və yaxınlarımızdan təcrid etməklə yanaşı, səhhətimizə də mənfi təsir göstərir. Amma bunun qarşısını almaq asan məsələdir. Təbii ki, iradəsi olan insanlar üçün. Mən elə insanlar tanıyıram ki, telefon onun üçün hava, su qədər dəyərli, siqaret qədər asılılıq yaradan amildir. Məsələn, mən övladlarımın 3-nə onlarla öz aramda müəyyən edilmiş vaxtda telefon verirəm. Televizora belə gün ərzində 1 saat baxa bilərlər. Qalan vaxtları isə onları öyrədici məşğələlərə, oyunlara cəlb edirəm. Elə vaxt olur ki, onlar üçün it, pişik, aslan, hətta oğru və ya polis oluram. Ümumiyyətlə, uşaqlara çox kiçik yaşlarda hüquq və öhdəliklərini öyrətmək, "olar" və "olmaz", nəyin hansı səbəbdən yarandığını izah etmək vacibdir ki, gələcəkdə belə problem yaranmasın".
Jurnalist Şərafət Şəfa:
"Doğrudur! Bu gün ən böyük problemlərdən biri də budur! Internet və telefon aludəçiliyi, deyərdim ki, bir çox uşaq və gəncləri uçuruma aparır. Təkcə sağlamlıqlarını almaqla yetmir, eləcə də mənəvi dəyərlərə və ətraf aləmə biganəlik sindromu yaradır. Bunu gördüyüm üçün övladlarımı bacardıqca sosial şəbəkələrdən uzaq tutmağa çalışmışam. Bu gün, demək olar ki, bütün ailələrdə bu problem var. Bunu zərərsizləşdirməyin yeganə yolunu uşaqları telefondan qoparıb mütalinə sevməyə yönləndirməkdi. Ağır iş olsa da, bunu etmək mütləq yaxşı nəticə verəcək!!! Çünki özüm belə etmişəm!"
"Sputnik Azərbaycan" informasiya agentliyinin əməkdaşı İradə Cəlil:
"Yox, mən usaqlarımda bu təsiri görmürəm. Çünki onların sosial şəbəkələrdən istifadəsini özüm idarə edirəm. Düşünürəm ki, bu, həqiqətən belədir. Hər bir yaşın öz inkişaf dövrü var. Bu inkişaf dövründə uşaq beynini nə ilə məşğul etdisə elə də davam edir. Məsələn, bu dövrdə dərs oxuyan uşaq bütün zamanını dərsə həsr edəcək və uşağın beyni ancaq dərslə çalışır. O zamanını oyunlara sərf edirsə, ancaq oyunlar barədə düşünür. Buna görə də valideynlər diqqətli olmalı, uşaqlarının boş vaxtını idarə etməlidirlər".
"Sputnik Azərbaycan" informasiya agentliyinin əməkdaşı Rumiyyə Miraslan :
“İki məktəbli övladı anası olaraq, deyim ki, bu məsələ mənimçün, bütün gücümü "səfərbər” etməmə baxmayaraq, böyük problemdir. Əsasən də 6-cı sinif şagirdi olan oğlum sosial mediadan, daha dəqiq desəm, yutubdan asılı vəziyyətə düşüb. Videolar çəkir, xüsusi oyunlar oynayır. Bu da təbii ki, həm səhhətinə, həm də dərslərinə mənfi təsir göstərir. Aqressivləşir, özünə qapanır, təmiz havada az olur, həmçinin dərsləri axsayır. Ona görə də oğlumun ancaq istirahət və tətil günlərində kompüterdən istifadə etməsinə izin verirəm. Ümumiyyətlə, çalışıram ki, bacardığım qədər uşaqlarımı kompüterdən, telefondan uzaq tutum. Qızımın 8-ci sinifdə oxumasına rəğmən, telefonu yoxdur. Əsla sosial şəbəkələrdən istifadə etməsinə icazə vermirəm. Çünki sosial şəbəkələrdə əhalinin hər təbəqəsindən olan insanlar cəmləşib. Qorumasaq, nəzarət etməsək, övladlarımız səviyyəsiz, mahiyyətsiz, əxlaqsız insanların təsirinə düşə bilərlər. Bu, elə bir məsələdir ki, zərərsizləşdirməni dövlətdən və ya kimlərdənsə gözləmək olmaz. Birbaşa valideynlər özləri buna güclü nəzarət etməlidirlər. Məsələn, qızımın və ya oğlumun hansısa sinif yoldaşının sosial şəbəkədə hesab açdığını görəndə, əsəbiləşirəm. Düşünürəm ki, görəsən, 18 yaşı tamam olmamış uşağın sosail şəbəkədə hesab açmasına valideyni necə razı olub? Bu sualın cavabını axtaranda isə belə bir qərara gəlirəm ki, bu məsələdə aidiyyatı qurumlar da hansısa addımları atmalıdır. Ən azı sosial şəbəkələrdə filtirasiya sistemləri tətbiq olunmalıdır ki, valideyn nəzarəti olmayan uşaqları həmin filtirasiya sistemləri vasitəsilə qorumaq mümkün olsun”.
"Qadın Liderliyi Uğrunda" İctimai Birliyinin sərdi Ülkər Abdullayeva:
"Biz uşaqlarımızı sosial mediaya yaxın buraxmırıq. Çünki bunun onların fiziki sağlamlığına, zehni qabiliyyətlərinin zəifləməsinə, psixologiyasına mənfi təsir etdiyini bilirik. Qohum və tanışların, eləcə də məktəb müəllimlərinin davamlı olaraq sosial mediadan istifadə edən uşaqlar haqqında dedikləri sözügedən hesabatda əksini tapanları təsdiqləyir. Düşünürük ki, bu hal internetdən və mobil tətbiqlərdən nəzarətsiz və məhdudiyyətsiz olaraq istifadə edən uşaqlarda yaranır. Biz uşaqları yalnız dərsləri üçün zəruri olan əlavə informasiyaları almaq, dizayn sahəsində qabiliyyətləri inkişaf etdirmək, xarici dil bilgilərini genişləndirmək, müxtəlif sənət nümunələrinin necə yaradıldığını öyrənmək, boş vaxtlarında musiqiyə qulaq asmaq və uşaq filmlərinə baxmaq üçün gadgetlərə yaxın buraxırıq. Bu zaman vaxt məhdudiyyəti tətbiq edirik. Onlara nadir hallarda kompüterdə oyun oynamaq fürsəti veririk. Kompüter oyunları seçəndə də çalışırıq ki, bu, daha çox onların zehni qabiliyyətini inkişaf etdirəcək oyunlar olsun. Məsələn, şahmat, qrafiklər qurmaq və s. kimi".
Jurnalist Esmira Qasımova:
"Mənim qızım yalnız Instaqram istifadə eləyir. Yuxusuna və dərslərinə heç bir təsir göstərmir. Sağlamlıq problemi də yoxdur.
Narazılıq olarsa, ayıraram, oğlum isə daha çox yutub kanalından istifadə edir, öz kanalı var. Həmçinin bütün sənədli filmləri ordan izləyib, məlumatını artırır".
Yazar Şəbnəm Karslı:
"Ümumiyyətlə, telefon, tablet və ya komüterin uşaqlara verilmə saatları müəyyən edilməlidir. Ağlayan uşağı susdurmaq üçün telefonu müddətsiz əlinə vermək başlıca yanlışdır. Fiziki oyunlara yönləndirmək lazımdır. Bəlkə də bizdə əkiz uşaq olduğu üçün bir az daha çətin olub, indi də çətinlik davam edir. Amma bir yandan da oyun dostu olduqları üçün şanslı sayılırıq. Onların virtual dünyaya bağlı olmaması üçün əlimizdən gələni edirik. Bizim uşaq olanda yatma saatlarımız vardı. Bu gün də o qayda evimizdə davam edir, axşam 9 tamamda uşaqlar yatır. Səhər də heç bir problem olmadan oyanırlar. Valideynlərin məsuliyyət hissi olmalıdır, rejim tətbiq edilməli və fövqəladə bir vəziyyət olmadıqca bu rejim pozulmamalıdır. Hazırda 8 yaşları var, o rejim pozulmadan davam edir. Təəssüf ki, gecə gec saatlara qədər körpə uşaqları yatırmayan, rejim tətbiq etməyən valideynlər zamanla daha çox çətinliklə üzləşirlər. Bünövrə sağlam qurulmalıdır".
Jurnalist Maya Quliyeva:
"Sosial media ümumilikdə həyatımızın bir parçası deyil, artıq tamı olub. Böyüklərin çoxunun işi ilə əlaqəli istifadə etdiyi interneti uşaqlar oyun, film, sosial aləmdə tanışlıq, yazışma, gündəlik şəkillərinin paylaşılması və s. kimi dəxlisiz istifadəsini görürük. Uşaq doğulanda ata və ananın əlində telefon görür və ağlayaraq istəyinə çatıb o telefonu öz əlinə alır. İndi bir çox ailədə necə deyərlər körpənin əlində süd balonu və oyuncaq yerinə telefon görmək olar. Hətta -"bizim uşaq interneti sökür" deyə fəxr edənlərimiz də az deyil. Amma bu "fəxr " uşağın gələcəkdə Skolioz - onurğa sütununun əyriliyi xəstəliyi olmamasına zəmanət verirmi? Skolioz xəstəliyi xüsusən gənc və yeniyetmə yaşlarında özünü daha qabarıq büruzə verir. əyriliklər əsasən döş və bel nahiyələrində müșahidə olunur. Günün yarıdan çoxunu komputer və telefonda başı aşağı və oynadığı oyunun təsirindən tam stressdə keçirən uşağın həm psixologiyasında, ətrafla əlaqədə, əsəb və sinir sistemlərindəki problemlər, qumar oyunlarına meyillik, sürətli maşınlara meyillik, birinci olmaq üçün qarşısına çıxanı əzmək bu kimi digər pis vərdişlər onun gələcəkdə əlbətdə ki, pis örnək olmayacağına hardan zəmanət verə bilər? Uşağın gec danışmasına {kiminlə danışsın?}, qonaq getdiyi yerdə digər uşaqlarla da ancaq aqressiv olması. Uşaqlarımızı sosial aləmdən uzaq tutmaq lazımdı. Bəli, mən özüm şəxsən icazə vermirəm. Birlikdə filmə və ya başqa bir verlişə baxmaq, elmdə ya da hansısa maraqlı bir sahədə yenilikləri izləmək olar. Amma gününü sosial aləmdə keçirtməsinə tam qadağa qoymaq lazımdı. Adi bir oğrunun ölümü, etdiyi pis əmələ görə ona edilən "hörməti" görən şagird kitab alarmı əlinə!? Biz yaşda valideynlərin ən azından uşaqlığı yarı müharibə olsa da olub. Klas-klas, Zapaz, Gizlənqaç, Dəsmal səndə, əl səndə, Bənövşə, Eşşəkbeli və s kimi oyunlarımız olub. Bəs indiki uşaqların uşaqlığı nə olub? Gələcəkdə bir-birinə nə danışacaqlar. Uşaqlıq yaşamayan uşaqlarımızın biz özümüz "qatili " olmayaq".