Xaçmazlı fermerlər payızlıq əkinlərlə bağlı maarifləndiriliblər
Dövlət Toxum Fondunun Əkinçilik və Tərəvəzçilik Elmi-Tədqiqat institutları ilə birgə Xaçmaz Dövlət Aqrar İnkişaf Mərkəzində (DAİM) təşkil etdiyi təlimlərdə yerli fermerlər payızlıq əkinlərlə bağlı maarifləndiriliblər.
Faktor.az-ın bölgə müxbiri xəbər verir ki, təlimin məqsədi payızlıq əkinlərə qulluğun səmərəliliyini yüksəltmək üçün fermerləri məlumatlandırmaq, həmçinin payızlıq əkinlərə hazırlıq işləri ilə əlaqədar görüləcək aqrotexniki tədbirlərin gecikməməsi üçün mütəxəssis tövsiyələrini vermək olub.
Təlimdə Dövlət Toxum Fondunun mütəxəssisləri, Əkinçilik və Tərəvəzçilik Elmi-Tədqiqat institutlarının alimləri, bölgə fermerləri, toxumçular, təsərrüfat rəhbərləri iştirak ediblər.
Fermerlərə payızlıq taxıl səpinində aqrotexniki tədbirlərin vaxtında və düzgün aparılması, bölgədə kənd təsərrüfatı bitkilərindən yüksək məhsul alınmasını təmin edən becərmə texnologiyalarının tətbiqi və səpinin yüksək keyfiyyətlə aparılmasına nail olmaq üçün elmi nailiyyətlər barədə məlumat verilib. Bölgənin torpaq-iqlim şəraitinə uyğun sortların seçilməsi və tətbiqi, müasir torpaq becərmələri, tətbiq olunan sortlar, səpinin elmi əsaslarla aparılma qaydaları, səpin müddəti, səpin norması və s. haqqında məsləhətlər verilib.
Təlimdə fermerləri maraqlandıran suallar ətraflı cavablandırılıb və geniş müzakirələr aparılıb, maarifləndirici kitabçalar paylanılıb.
Növbəti təlim-seminarların Ağcabədi və Şəki rayonlarında keçirilməsi nəzərdə tutulub.
