Təhsil nazirinin təltif etdiyi AzTU əməkdaşlarına təltiflər təqdim olunub - FOTOLAR
Təhsil naziri Emin Əmrullayevin əmrinə əsasən, Azərbaycan Texniki Universitetinin (AzTU) 70 illiyi münasibətilə bu ali təhsil müəssisəsinin “Qabaqcıl təhsil işçisi" döş nişanı və fəxri fərmanla təltif olunan əməkdaşlarına mükafatların təqdimetmə mərasimi keçirilib.
Tədbirdə çıxış edən rektor Vilayət Vəliyev təltif olunanları təbrik edib və onlara uğurlar arzulayıb. Rektor AzTU-nun 70 illik yubileyi münasibətilə Prezident İlham Əliyevin sərəncamlarına əsasən, bir qrup professor-müəllim heyətinin təltif olunduğunu da xatırladıb və universitet əməkdaşlarına bu cür qiymətin verilməsinə görə dövlət başçısına təşəkkür edib. Bildirib ki, hazırda əsas hədəf AzTU-nu regionun ən yaxşı universitetləri səviyyəsində inkişaf etdirmək, tədrisin keyfiyyətini yüksəltməkdir. Bunun üçün son dövrlərdə Türkiyə, eləcə də bir sıra xarici ölkə universitetlərinin təcrübəsindən geniş istifadə olunur.
Daha sonra universitetin əməkdaşlarına təltiflər təqdim olunub.
