Yəhya Babanlının təklifi Ramiz Mehdiyev tərəfindən dəstəklənib
Tarix üzrə fəlsəfə doktoru Yəhya Babanlının 4 ay bundan əvvəl dövlət başçısı cənab İlham Əliyevə eyni zamanda AMEA-nın prezidenti, akademik Ramiz Mehdiyevə "Azərbaycançılıq" ideoloji institutunun yaradılması ilə bağlı göndərdiyi təklif reallaşıb.
Bu barədə məlumat verən Yəhya Babanlı bildirib ki, artıq AMEA-da Azərbaycançılıq Elmi-İdeoloji Mərkəzi yaradılıb.
Təklif siyasi-idealoji kontekstə Azərbaycan Respublikasının Prezidentinə, elmi-tədqiqat nöqteyi-nəzərindən AMEA-nın rəhbərliyinə ünvanlanmışdır.
Y.Babanlı öz layihə-təklif məktubunda bildirmişdir ki, Azərbaycan Respublikasının müstəqil dövlət siyasətinin ana xəttini təşkil edən və bütün azərbaycanlıları birləşdirən dəyərə çevrilən Ümummilli Lider Heydər Əliyevin milli təhlükəsizliyimiz üçün həyati vacib əhəmiyyətli ideyasının "Azərbaycançılıq" fonemeninin elmi-nəzəri əsaslarının öyrənilməsi və praktiki olaraq düzgün istiqamətləndirilməsi məqsədi ilə institusional quruculuq fəaliyyətinin müəyyən edilməsi milli məkfurələrin mübarizəsi şəraitində yaşadığımız mürəkkəb dövrün tələbləri sırasındadır.
Bu xüsusda, Y. Babanlı dövlət başçısına Heydər Əliyev adına "Azərbaycançılıq" institutunun yaradılması təklifini irəli sürmüşdür.
Y.Babanlı qeyd edib ki, təklifin nəzəri əsaslarının tədqiqi üçün akademiyanın prezidentinə də göndərilmişdir:
"Əminəm ki, bu, dahi Heydər Əliyevin ümummilli ideologiyası dövlətçiliyimizin möhkəmlənməsinə xidmət edəcəkdir. BDU-nun 100 illik yubileyində Dövlət Başçımızın qeyd etdiyi ideoloji boşluğu dolduracaqdır".
Məlumat üçün bildirək ki, ötən gün AMEA-nın Rəyasət Heyətində Azərbaycançılıq Elmi-İdeoloji Mərkəzinin yaradılması və fəaliyyət istiqamətləri ilə bağlı müşavirə keçirilib. Müşavirədə akademik Ramiz Mehdiyev dövlət başçısı İlham Əliyevin siyasi-ideoloji çağırışlarının əsasında yaradılmış mərkəzin əhəmiyyətindən danışıb. O, azərbaycançılığın bütün dünya azərbaycanlılarının birlik və həmrəylik ideologiyasına çevrilməsində ümummilli lider Heydər Əliyevin tarixi xidmətləri olduğunu, azərbaycançılıq ideologiyasının özündə xalqımızın milli maraqları və dövlətçilik mənafeyini əks etdirdiyini bildirib. Akademik bu məfkurənin elmi cəhətdən araşdırılması üçün akademiyanın tərkibində ictimai əsaslarla yaradılan yeni mərkəzdə azərbaycançılıq ideologiyasının tarixi, mənəvi, siyasi, fəlsəfi, ədəbi baxımdan öyrənilməsinin, bu sahədə tədqiqat və təbliğat işlərinin aparılmasının vacibliyini diqqətə çatdırıb.
Müşavirədə çıxış edən AMEA-nın birinci vitse-prezidenti, akademik İsa Həbibbəyli akademiyada belə bir mərkəzin yaradılmasını mühüm elmi-tarixi hadisə kimi qiymətləndirib.
