Bu gün Azərbaycanda 20 Yanvar - Ümumxalq Hüzn Günüdür
Bu gün Qanlı Yanvar hadisəsindən 30 il ötür
Bu gün Azərbaycanda 20 Yanvar - Ümumxalq Hüzn Günüdür.
Faktor.az-ın məlumatına görə, bu gün Qanlı Yanvar hadisəsindən 30 il ötür.
1990-cı ilin bu günü Azərbaycan xalqının taleyində qorxunc günlər yaşanıb. Xalqımız "qırmızı imperiyanın" "Qızıl ordusu"nun, sovet hərb maşınının həmləsinə məruz qalıb. Xalqımız təcavüzə uğrayıb, günahsız insanlar gülləbaran edilib.
Böyük itkilərlə, günahsız insanların qətli ilə nəticələnən 20 Yanvar faciəsi Mixail Qorbaçov başda olmaqla cinayətkar imperiya rəhbərliyinin Azərbaycana qarşı xəyanətkar siyasətinə dözməyən, öz azadlığına, müstəqilliyinə can atan Azərbaycan xalqının həm də mübarizliyini, əyilməzliyini, məğrurluğunu nümayiş etdirib. 1990-cı ilin 20 yanvarında keçmiş sovet dövlətinin hərb maşınının Azərbaycan xalqına qarşı həyata keçirdiyi qətllər insanlığa qarşı törədilmiş ən ağır cinayətlərdən biri kimi bəşər tarixində qara səhifə olaraq qalacaqdır. Milli azadlığı, ölkəsinin ərazi bütövlüyü uğrunda mübarizəyə qalxmış dinc əhaliyə divan tutulması, kütləvi terror nəticəsində yüzlərlə günahsız insanın qətlə yetirilməsi və yaralanması totalitar sovet rejiminin süqutu ərəfəsində onun cinayətkar mahiyyətini bütün dünyaya bir daha nümayiş etdirib.
1990-cı il yanvarın 19-da Mixail Qorbaçov SSRİ Konstitusiyasının 119-cu, Azərbaycan SSRİ Konstitusiyasının 71-ci maddələrini kobud şəkildə pozaraq, yanvarın 20-dən Bakıda fövqəladə vəziyyət elan edilməsi haqqında fərman imzalayıb. SSRİ Müdafiə Nazirliyinin, DİN və DTK-nın hazırlayıb həyata keçirdiyi "Udar" adlı əməliyyatda əsas rolu xüsusi təyinatlı "ALFA" və SSRİ DTK-nın "A" təxribat qrupları oynayırdı. Sovet qoşunlarının təcavüzü nəticəsində Bakıda 134 mülki vətəndaş öldürülüb, 600-dən çox adam yaralanıb. Öldürülənlər arasında beş millətin nümayəndələri, 20-dən çox qadın, uşaq var idi. Yanvarın 19-da gecə qoşun fövqəladə vəziyyət elan edilməsindən xəbərsiz olan şəhərə daxil olub və əhaliyə divan tutub. M.Qorbaçovun fərmanı qüvvəyə minənədək (20 yanvar, saat 00:00) artıq 9 nəfər öldürülüb.
Tanklar və BTR-lər Bakı küçələrində qarşılarına çıxan hər şeyi əzib, hərbçilər hər yanı amansız atəşə tutublar. İnsanlar nəinki küçələrdə, hətta avtobusda gedərkən öz mənzillərində oturduqları yerdə güllələrə tuş gəliblər. Yaralıları aparmağa gələn təcili yardım maşınları və tibb işçiləri də atəşə tutulublar.
