YAP Binəqədi rayon təşkilatında qadın seçicilərlə görüş keçirildi

Hit: 421
YAP Binəqədi rayon təşkilatında qadın seçicilərlə görüş keçirildi
Yeni Azərbaycan Partiyası Binəqədi rayon təşkilatında bu ilin 23 dekabr tarixində ölkəmizdə keçiriləcək V çağırış Bələdiyyə seçkilərinin təbliğat-təşviqat kampaniyası çərçivəsində Yeni Azərbaycan Partiyası tərəfindən Binəqədi rayonu bələdiyyələri üzrə namizədliyi irəli sürülmüş qadınlarla qadın seçicilərin görüşü keçirildi. Görüşdə Milli Məclisin sədr müavini, YAP İdarə Heyətinin üzvü Bahar Muradova, seçicilər, partiya fəalları iştirak etdilər.
 
Görüşü giriş nitqi ilə açan YAP Binəqədi rayon təşkilatının sədri, YAP Mərkəzi Seçki Qərargahının Binəqədi rayon şöbəsinin sədri Ramiz Göyüşov ölkəmizdə yaradılan seçki mühitindən, vətəndaşlarımızın seçmək hüququndan, Yeni Azərbaycan Partiyasının seçkilərə hazırlığından və namizədlər haqqında məlumat verdi. Qeyd etdi ki, rayon təşkilatı ötən seçkilərdə olduğu kimi bu dəfəki Bələdiyyə seçkilərinə də yüksək səviyyədə hazırlaşaraq namizədlərlə seçicilərin silsilə görüşlərini təşkil edir. Ramiz Göyüşov çıxışının sonunda namizədlərə uğurlar arzu etdi. Bahar Muradovaya seçicilərlə keçirilən görüşdə iştirak etdiyinə görə təşəkkürünü bildirdi.
 
Görüşdə YAP-ın Binəqədi qəsəbə Bələdiyyəsi üzrə irəli sürülmüş namizədi, YAP Binəqədi rayon təşkilatı Qadınlar Şurasının sədri Aytac Əliyeva, Binəqədi Bələdiyyəsi üzrə irəli sürülmüş namizədi, YAP Binəqədi rayon təşkilatının baş məsləhətçisi Kubra Əliyarlı, Biləcəri Bələdiyyəsi üzrə irəli sürülmüş namizədi, Biləcəri Bələdiyyəsinin sədr müavini Samirə Həsənova, Xocasən Bələdiyyəsi üzrə irəli sürülmüş namizədi, YAP Binəqədi rayon təşkilatının gənc fəalı Fidan Əhmədzadə, Rəsulzadə Bələdiyyəsi üzrə irəli sürülmüş namizədi Jalə Sadıqova çıxış edərək bildirdilər ki, seçkilərdə Yeni Azərbaycan Partiyasının namizədi olaraq iştirak edərək qürurvericidir. Onlar bütün seçiciləri Yeni Azərbaycan Partiyasını namizədlərinə səs verməyə çağırdılar. Bələdiyyələrin qarşısında duran həlli vacib məsələlərə toxunaraq gələcəkdə bələdiyyələrdə təmsil olunacaqları təqdirdə həmin məsələlərin həlli istiqamətində səylə çalışacaqlarını, seçicilərin etimadını doğruldacaqlarını vurğuladılar.
 
Görüşdə geniş nitq söyləyən Milli Məclisin sədr müavini, YAP İdarə Heyətinin üzvü Bahar Muradova namizədlərə öz tövsiyyələrini bildirdi. Qeyd etdi ki, bu gün ölkəmizin sürətli inkişafı dövlət başçısı cənab İlham Əliyevin uzaqgörən siyasətinin nəticəsidir. Bələdiyyə qurumlarında təmsil olunan şəxslər də bu siyasətə paralel olaraq uğurla fəaliyyət göstərməli, göstərilən etimadı yüksək səviyyədə doğrultmalıdırlar. Bahar Muradovanın sözlərinə görə namizədlərin seçicilərlə silsilə görüşlərinin keçirilməsi olduqca mühüm əhəmiyyət daşıyır. Bu görüşlər yerlərdə də davam etdirilməli, əhalini maraqlandıran məsələlərin həlli ilə bağlı fikir mübadiləsi aparılmalı, onların fikirləri dinlənilməlidir. Hər bir namizədin savadı, intellekti, dünya görüşü və siyas yetkinliyi ilə seçildiyini vurğulayan Bahar Muradova qarşıdan gələn seçkilərdə namizədlərə uğurlar arzuladı. Onların parlaq qələbə qazanacaqlarına ümidvar olduğunu bildirdi.
 
Görüşdə həmçinin seçicilər də çıxış edərək fikirlərini səsləndirdilər. Namizədlərə uğurlar arzuladılar.








Redaktorun seçimi