Ölkələri “sevimli” və “düşmən” qruplarına ayıran “Freedom House”
Deputatların fikrincə, dövlətimiz üçün “Freedom House”un hazırladığı hesabat və onun Azərbaycanla bağlı hissəsi kağız parçasından başqa bir şey deyil
Demokratiya və insan haqları ad altında hər zaman ölkələrin daxili işlərinə müdaxilə etməyə cəhd göstərən təşkilatlar növbə ilə Azərbaycanı yenidən hədəfə gətirmək cəhdi göstərirlər. Onların yaydıqları hesabatların hansı metodologiya ilə hazırlanması və məlumat mənbələri məsələsi isə hər zaman "təhlükəsizlik tədbirləri” kimi arxa plana keçirilir. Bu günlərdə özünü "demokratiya carçısı”, "insan haqlarının qoruyucusu” kimi tanıdan, amma əslində ölkələrə qərəzli yanaşan "Freedom House” təşkilatının yaydığı hesabatın timsalında bunun bir daha şahidi oluruq.
Millət vəkili, politoloq Aydın Mirzəzadə bildirdi ki, "Freedom House” xarici ölkələrdən birinin yerli qeyri-hökumət təşkilatıdır: "Ona heç bir dövlət hansısa bir səlahiyyət verməyib. Amma təşkilatın başqa ölkələrə qiymət vermək, onların daxili işlərinə qarışmaq mərəzinin sərhədi görünmür. O özünü dünya prokuroru, Haaqa məhkəməsi, BMT, AŞ PA və bu kimi beynəlxalq təşkilatlar kimi səlahiyyətə malik olan bir qurum hesab edir və ümumən götürdükdə, onun verdiyi qiymət subyektiv sayıla bilər. Bu təşkilatın gəldiyi nəticələrin hansı metodologiya və hansı mənbələrdən istifadə olunaraq hazırlandığı belə məlum deyil. Bu və ya digər ölkədə gedən proseslərin illərlə nəzərə alınmadığı göz qarşısındadır. "Freedom House”un ayrı-ayrı ölkələri sevimli və nifrət etdiyi ölkələr qrupuna böldüyü də bütün dünyaya məlumdur. Hesab edirəm ki, bu tip təşkilatların verdiyi qiymətləri müzakirə etməyə dəyməz. Onların buna səlahiyyəti yoxdur, ayrı-ayrı ölkələrin daxili işlərinə qarışmaq və onları bir cərgəyə düzməyin özü mənəviyyatdan uzaq məsələdir”.