Yüksəkixtisaslı nefroloq Mirmənsim Məmmədov

Hit: 440
Yüksəkixtisaslı nefroloq Mirmənsim Məmmədov

“Həkimlərimizi tanıyın!” rubrikamızda sizlərə peşəkarlığı, yanaşması ilə seçilən yüksəkixtisaslı nefroloq Mirmənsim Məmmədovu təqdim edirik.

Dr.MİRMƏNSİM MƏMMƏDOV Mərkəzi Gömrük Hospitalında nefroloji xəstələrin və böyrək transplantasiyası olmuş xəstələrin poliklinik və stasionar müalicəsi, hemodializ kateterinin qoyulması, uzun müddətli hemodializ kateterinin qoyulması, kəskin və xroniki böyrək çatışmazlığında hemodializ, hemofiltirasiya, izolyasiya olunmuş ultrafiltrasiya, membran plazmafarez, böyrəklərin incə iynə ilə biopsiyasını həyata keçirir. Hazırda Mərkəzi Gömrük Hospitalının koronavirus xəstələri üçün pandemiya xəstəxanası kimi fəaliyyət göstərdiyi müddətdə Hospitalın bütün personalı virusla mübarizəyə qoşulmuş və COVİD-19 viruslu xəstələrlə birbaşa çalışaraq, xəstələrin müalicə prosesində birbaşa iştirak edir.
 
Dr.Mirmənsim Məmmədov 2008-ci ildə Azərbaycan Tibb Universitetini bitirmiş, 2008-2009-cu illərdə Mərkəzi Dəmiryol Xəstəxanasında internatura keçmişdir. 2011-2013-cü illərdə dövlət tibb müəssisəsində həkim-nefroloq kimi çalışmışdır. Dr.Mirmənsim Məmmədov 2013-cü ildən Mərkəzi Gömrük Hospitalında nefroloq, 2018-ci ildən isə Hospitalın Efferent terapiya şöbəsinin rəisi kimi fəaliyyət göstərir. O, daim öz bilik və bacarıqlarını artıran, özünə qarşı çox tələbkar olan yüksəkixtisaslı mütəxəssisdir.
 
Dr.Mirmənsim Məmmədov müxtəlif illərdə xarici ölkələrdə təşkil olunan təkmilləşdirmə kurslarında, beynəlxalq konqreslərdə iştirak etmişdir. Belə ki, 2009-2011-ci illərdə Türkiyə 9 Eylül Universitetinin nefrologiya kafedrasında, 2015-ci ildə Türkiyənin Akdeniz Univerisitetinin Orqan Transplantasiyası Mərkəzində təkmilləşdirmə kursları keçmişdir. O, 2015-ci ildə Türkiyənin Ankara şəhərində XII Beynəlxalq İntensiv Terapiya konqresində və 2018-ci ildə Antalyanın Belek şəhərində Beynəlxalq nefroloji, hipertoniya, dializ və transplantasiya konqresində iştirak etmişdir.
 
Dr.Mirmənsim Məmmədov 2019-cu ilin aprel ayında Türkiyənin Ankara şəhərində yerləşən Ankara Tibb Universitetinin Pediatriya xəstəxanasında "Uşaqlarda kəskin və xroniki böyrək çatışmazlığı zamanı peritoneal dializ" mövzusunda təkmilləşdirmə kursunda, həmin ilin oktyabr ayında Türkiyənin Malatya şəhərində yerləşən İnönü Universitetinin Qaraciyər Transplantasiya İnstitutunda hepatorenal sindromlu xəstələrdə ekstrakarporal müalicə üzrə təkmilləşdirmə kursunda iştirak etmişdir. Həkim barədə daha ətraflı məlumat almaq üçün bu linkə daxil ola bilərsiniz: https://customshospital.az/mirmensim-memmedov.







Redaktorun seçimi