"Belə bir dövrdə bu qəti surətdə yolverilməzdir"

Hit: 1009
"Belə bir dövrdə bu qəti surətdə yolverilməzdir"

Dr. Lalə İbrahimova: “Yaralı əsgərlərimizin immunitetinin zəif olmasını nəzərə alaraq, onlarla görüşlərin təxirə salınmasını, bu görüşlərin virtual şəkildə həyata keçirilməsini xahiş edirəm”.

Son vaxtlar ölkəmizdə COVID-19 virusuna  yoluxma sayı və ölüm halları hər gün artmaqdadır. Həftənin statistikasına nəzər saldıqda, heç də ürəkaçan göstəricilərlə qarşılaşmadığımızı görərik. Yoluxmaların sayı 4400-ü keçmiş, ölüm hallarının sayı isə hər gün 40-dan yuxarıdır. COVID-19 virusunun ölkəmizdə geniş yayıldığı bir dövrdə yaralı əsgərlərimizi xüsusilə bu virusdan qorumaq vacibdir. Mərkəzi Gömrük Hospitalının nevroloqu Lalə İbrahimovanın yaralı əsgərlərə kütləvi şəkildə baş çəkməyin yaratdığı təhlükə haqqında məqaləsini Sizə təqdim edirik.
 
27 sentyabr 2020-ci il tarixində başlamış ordumuzun erməni işğalçılarılna qarşı əks-hücumu və 44 günlük Vətən müharibəsi nəticəsində 30 illik həsrətə son qoyuldu! Azərbaycan orudusu yeni tarix yazdı! Bizə bu sevinci yaşatdığına görə Ali Baş Komandanımız İlham Əliyevə və Müzəffər ordumuza minnətdaram. Sevincimizin həddi-hüdudu yoxdur. Lakin unutmaq lazım deyil ki, gözəgörünməyən başqa bir düşmən – COVID-19 virusu da var.
 
Qeyd edim ki, bu virusa yoluxduqdan sonra 7-14 gün ərzində inkubasiya dövrü müşahidə edilir. Bu dövrdə  insanda heç bir simptom olmur, lakin insan yoluxdurucu olur. Gizli dövr sayılan inkubasiya müddəti bitdikdən sonra simptomlar yaranır. Yeni növ koronavirusa yoluxmuş insanların 80%-i xəstəliyi simptomsuz, 15%-i orta ağır və 5%-i isə ağır keçirir. Xəstəliyin ağır keçməsinin əsas səbəbi insanlarda immunitetin aşağı olması və  yanaşı xəstəliklərin mövcudluğudur. 
 
Xalqımızın əsgərlərimizə sevgisi o qədər böyükdür ki, yaralı əsgərlərimiz stasionar müalicədən sonra evlərinə ambulator müalicə üçün göndərildikdə, insanlar onlarla kütləvi şəkildə görüşə gedirlər. Artıq bir müddətdir ki, sosial şəbəkələrdə insanların yaralı əsgərlərin evlərinə getməsi, karantin qaydalarını pozaraq əsgərləri qucaqlayıb öpməsi, maskasız yaxın məsafədə onlarla ünsiyyət qurmasının şahidi oluram. Azərbaycanda COVID-19 virusuna yoluxanların sayının artdığı bir dövrdə bu qəti surətdə yolverilməzdir.
 
Yeni növ koronavirusa yoluxmuş şəxs bundan xəbərsiz və ya bu xəstəliyi yüngül keçirə bilər. Odur ki, yaralı əsgərlərimizin immunitetinin zəif olmasını nəzərə alaraq, onlarla görüşlərin təxirə salınmasını, bu görüşlərin virtual şəkildə həyata keçirilməsini  xahiş edirəm. Bu Sizin yaralı əsgərlərimizə göstərəcəyiniz sevginin ən bariz nümunəsi olacaq. Şəhidlərimizə Allahdan rəhmət diləyirəm, onların ruhu qarşısında baş əyirəm, yaralı əsgərlərimizə isə tezliklə sağlamlıqlarının bərpa olunmasını arzulayıram.
 
(012) 404-08-08
Bakı, K.Kazımzadə, 118








Redaktorun seçimi