BAAU-nun kollektivi 20 Yanvar faciəsinin qurbanlarının xatirəsini yad etdilər - FOTOLAR
Bu gün Bakı Avrasiya Universitetinin professor–müəllim kollektivi və tələbələri Şəhidlər xiyabanını ziyarət edərək ölkəmizin azadlığı və suverenliyi uğrunda mübarizədə canlarından keçmiş qəhrəman Vətən övladlarının - 20 Yanvar faciəsinin qurbanlarının xatirəsini ehtiramla yad edib, məzarlarına tər güllər düzüblər.
XX əsrdə insanlığa qarşı törədilmiş ən dəhşətli faciələrdən olan 20 Yanvar faciəsi xalqımızın qan yaddaşına əbədi iz buraxıb. Bu hadisələr həm də Azərbaycan tarixinə qəhrəmanlıq salnaməsi kimi yazılıb, xalqımızın gələcək taleyinə, milli azadlıq hərəkatının daha da güclənməsinə, müstəqilliyimizin bərpasına mühüm təsir göstərib.
1990-cı il yanvarın 19-dan 20-nə keçən gecə sovet ordusu Bakıya yeridilərək xüsusi qəddarlıq və görünməmiş vəhşiliklər törədib. Bu qanlı akt Azərbaycan xalqının milli azadlıq hərəkatını boğmaq üçün ölkəmizə qarşı törədilən hərbi təcavüzün göstəricisi idi. Həmin gecə 140-dan çox dinc sakin öldürülüb, yüzlərlə insan yaralanıb və itkin düşüb. Bu misilsiz qəddarlığa ilk dəfə siyasi və hüquqi qiymət ulu öndər Heydər Əliyev tərəfindən verilib.
20 Yanvar faciəsinin dünya ictimaiyyəti və beynəlxalq qurumlar tərəfindən tanınması, günahkarların cəzalandırılması istiqamətində bugün də mühüm işlər görülür. Xalqımızın milli birliyinə mühüm təkan verən və Azərbaycan tarixinin şanlı səhifələrindən biri olan 20 Yanvar şəhidlərinin xatirəsi daim qəlblərimizdə yaşayacaq.
Baau mətbuat xidməti //Faktor.az
