Kamal Abdullanın “Unutmağa kimsə yox…” romanı ikinci dəfə nəşr olunub

61 dəfə oxunub
Kamal Abdullanın “Unutmağa kimsə yox…” romanı ikinci dəfə nəşr olunub

Azərbaycan Dillər Universitetinin rektoru, AMEA-nın həqiqi üzvü, Əməkdar elm xadimi, görkəmli yazıçı Kamal Abdullanın “Unutmağa kimsə yox…” romanının II nəşri işıq üzü görüb.

Kitab “Qanun” nəşriyyatında çap olunub.  “Unutmağa kimsə yox…” son illərin ən çox müzakirə olunan əsərlərinin (“Yarımçıq əlyazma”, “Sehrbazlar dərəsi”) müəllifi olan Kamal Abdullanın hələlik son romanıdır.  Nəşriyyat kitabı dil, ideya, üslub baxımından analoqu olmayan fakt kimi dəyərləndirərək təkrar çap edib.

Kolumb Hindistanı axtarıb Amerikanı kəşf edən kimi gənc alim naməlum bir çiçəkli yazıda hamının gözlədiyi müharibələrin, padşahların, sərkərdələrin taleyini yox, bir sevgi məktubunu deşifrə edir.

Paralel dünyalar, möhtəşəm ahəng, hadisələrin üfüqi, Çiçəkli yazı… bütün bunlar ilk baxışda sadə bir hadisənin fonunda əsər boyu canlı kimi nəfəs alır.

Bu roman çap olunduqdan sonra Azərbaycan ədəbi mühitində geniş müzakirələrə səbəb olub. Roman haqqında müxtəlif qəzet və internet saytlarda müzakirələr aparılıb.

“Unutmağa kimsə yox…” müəllifin digər romanları kimi müxtəlif dillərə tərcümə olunur.

“Ön söz”ün müəllifi İstanbul Yedditəpə Universitetinin dosenti Arif Acaloğludur. “Ön söz”də roman müxtəlif aspektlərdən təhlil olunur, oxucuya əsəri daha dərindən anlaması üçün ipucları verilir. Arif Acaloğlu romanı dil sərhədlərini aşan və yalnız alternativ təhlillərlə qavranıla bilən kitab kimi dəyərləndirir.



Redaktorun seçimi