Şeirləri dillərdən düşməyən İntiqam Yaşarın "Evdə yoxam" kitabı - Təqdim ediləcək
Sən, ey başdaşından boylanan şəkil,
Dünyaya baxmaqdan yorulmadınmı?
Burdan gəlib keçən haqqa çatmaza,
Dişini sıxmaqdan yorulmadınmı?
Bir gəlib tozunu silənin də, yox.
Sən kimdin, nəçiydin – bundan kimə nə?
Bəlkə bir istəyin, bəlkə arzun var,
Utanma, çəkinmə, buyur, de mənə.
Əvvəllər bir qadın görərdim hərdən,
Gəlib dayanardı sənlə üzbəüz.
Deyəsən, heç o da baş çəkmir daha,
Nə dedin, xətrinə dəydi hansı söz?
Bəlkə o qadın da köçüb dünyadan,
Köçübsə görəsən hardan boylanır?
Yəqin başqa yerdə dəfn eləyiblər,
Yəqin bir şəkil də ordan boylanır...
****
10 İyun saat 13:40-da Azərbaycan Milli Kitabxanasında AYB-nin üzvü, Prezident təqaüdçüsü, gənc şair İntiqam Yaşarın yeni işıq üzü görmüş "Evdə yoxam" adlı şeirlər kitabının təqdimat mərasimi keçiriləcəkdir.
Təqdimata giriş sərbəstdir.
(Ünvan : Azərbaycan Milli Kitabxanası.."Sahil" metrosunun yaxınlığı...Rəşid Behbudov adına Dövlət Mahnı Teatrı ilə üzbəüz )